الحمد الله تاج بدل عمة الضرايب مصلحتي أولا

مممممممممم !

جالي تااااااج ... آه و الله العظيم تلاتة جالي تااااااج ....

و مش واسع على راسي الحمد لله ... دلوقتي أنا أكبر من سيمبا بكتير و إن كان على عم سكار فمش هيشمت فيا علشان التاج كبير عليا ....

دلوقتي هقدر أحكم أرض العزة ..... نالااااااااااااااااا ..... دااااااااااارش....

أحم أحم !!!

شكلي بدقت أخرّف ...

لأ بجد اسيبني من أعراض الشيخوخة .... ندخل في الجد ....

جالي إمبارح تاج من " الجواز و سنينه" صاحبة مدونة " جواز و اتجوزنا " ...

تخلت عن التاج لخمسة منهم أنا .... أعوذ بالله طبعاً من كلمة أنا دي ....

تستاهلي و الله جايزة الحكم الرشيد .... فينك يا محمد يا ابراهيم ....

مش أي حد بيتخلى عن التاج اليومين دول طواعية يعني ....

هو ده التداول السلمي للسلطة اللي بنادي بيه ...

مبروك عليكي بقى الخمسة مليون دولار ....

دولااااااااار $$$$ مش جنيه :)

دي الديمقراطية فلوسها كتير قوي ....

نروح بقى للتاج ... اللي مش أي تاج ....

الدستور بقى بتاع المملكة ....

المادة الأولى : اذكر عشرة اشياء عن نفسك.

المادة التانية : خمس اشخاص تهدى لهم التاج.

المادة التالتة : لا تهدى التاج لمن اهداه اليك.

المادة الرابعة : عرف اللى بعتلك التاج انك نزلته عندك ।

اذكر عشرة اشياء عن نفسك:

يا جماعة بقى يا جماعة ليه بس الإحراج ده ... يا كسوفي يا كسوفي ... أتكلم عن نفسي ... ما نخلي أفعالي تتكلم بقى زي ما بيقولوا في التفليزيون ..

طيب طيب .... هنجز حاضر ... بث كده ... هقولكم بقى كلام م الكبير بتاع الوزراء و رجال الأعمال و أصحاب الطوابين بتاعة العيش ....

1. أول حاجة بقى .... باكل كتير و ما بيبنش عليا ... طفس ... بس من بعد النزلة المعوية قللت في الأكل ... مش عايز اعمل غسيل معدة ... برسيل مش هيخش معدتي أبداً ...
2. دي تاني حاجة .... مؤمن بتوفيق ربنا أنه قبل أي شيء و بعد توفيق ربنا دعاء الوالدين.
3. بحب بابا الله يرحمه جداً جدا ... و بحب ماما جداً جداً جداً .... برج السرطان بقى أعمل إيه.... دعواتها بعد توفيق ربنا و رضاها عني هي السر في أي نجاح ليا سواء دراسي أو غير دراسي.... بصوا بصوا ... نصيحة من فاشل ... اسمعوا كلام مامتكم و بهبهاتكم و ما تذكروش و هتنجحوا بإذن الله ...
4. خايف الدنيا تخلص و أنا بنط من هدف للهدف اللي بعدة من غير ما استمتع بالدنيا, و ده الهاجس اللي بيجيلي كل شوية و منغص عليا عيشتي....
5. بطيء جداً في اتخاذ أي قرار علشان بخاف أغلط .... فلازم آخد بالي من كل الظروف المحيطة ... ملابسات القضية...
6. ممممممم ! أقول إيه تاني ... آه آه أفتكرت ..... بخااااااااااااف موت من المواجهات في المشاكل سواء كنت على حق أو أنا اللي غلطان .... ماليش في اللوم .... و لما أبو الهول ينطق و ألوم أي واحد بيكون فات شهور !!!! هو عموماً بيكون نسي دايما ....
7. بخاف من القيادة أو السلطة بس بحب أبدع فيها أو أحقق أي أنجاز جديد و غير مسبوق .... بس بحس في أول الأمر أني هغرق في شبر مية و ساعات بحس أن الكل منفض فبكون عايز أعيط .... آه و الله بيبقى نفسي أعيط ..... بس بعد كده الحمد لله بقدر أسيطر على مقاليد الأمور .... حلوة مقاليد الأمور مش أي حد بيقولها على فكرة يعني على فكرة...
8. مقتنع قوي قوي قوي أن المال وسيلة و ليس غاية ... ساعات أقعد أحوش أحوش أحوش و ف ثانية أضيعها في حاجات غريبة ... بس الحمد لله مش هايفة.
9. هههههههههههههههه بجيب شعري على جنب .... مش عارف ليه الموضوع ده مستفز ناس كتير بس مش عارف أغير الحكاية دي ... فيه حد ممكن يغير مناخيرة؟؟؟ ... فيه حد من يغير شفايفه؟؟؟؟ ... فيه حد ممكن يجيب الودن الشمال مكان اليمين ؟؟؟؟ .... أهو أنا ما أقدرش بقى أجيب شعري على جنب ... أولع فيه يعني .... أحلقه زلبطة ؟؟؟ .... هو كده .....
10. نفسي ربنا يكون راضي عني و الناس تفتكرني بالخير و بس .

أهدي التاج لحد ...... مممممم .... طيب ما اتهني بيه شوية ؟!!!! .... نفسي أبقى ديكتاتور .... ياللا فرصة تانية...

1. أحمد عبد الرحمن ... صاحب مدونة "أحمد عبد الرحمن" ...
2. مصطفى ريان .... صاحب مدونة إبداعات شاب ثائر....
3. لست أدري ..... صاحبة مدونة شوية شخبطة ...
4. ليكوريكا ..... صاحب مدونة مجرد مشاعر ...
5. غادة الكاميليا ... صاحبة مدونة وقع الخطى ...

نيجي بقى للتبليغ .... ثواني آخد توك توك و أروح القسم أبلغ ...

يا ريت نعرف نحمينا ... حملة حماية ... الجزء التاني ... أكشن

ندخل بقى في صلب الموضوع و نبعد عن حديده ... الحديد غالي و بياكل المرتب و العلاوة و الحوافز و النقطة ..... بخصوص بقى حملة حماية و اللي شفته على الموقع ده كله ... فكل ده كويس و زي الفل .... بس على الرغم من كده بعد ده كله أنا مش مقتنع على الإطلاق أن الحملة بالمصاريف بتاعتها دي ممكن تحقق حاجة .... هو كويس و زي الفل و الياسمين و القرنفل و الجنزببيل .... بس نظرياً .... مش واقعي .... بالنسبة للشباب و غير الشباب مش وسيلة ضغط نفسي..... هو صحيح رأي شخصي و كل حاجة و إحنا في بلد الحريات و كل واحد يعبر عن رأيه بكل حرية و مفيش حاجة بتحصله خالص خالص ... بس أعتقد أني على صواب حتى يثبت العكس .....

لحد دلوقتي مش مقتنع – وده الواقع – أن فيه واحد ممكن يتخلي عن السجاير علشان الحملة ... و مفيش واحد بيضرب حقن و لا بيبلبع حبوب و عامل زوره و لا مواسير الصرف الصحي بيروح ليها من كل صنف و لون ... و لا برضوا واحد من اللي بيشموا ... مفيش واحد من دول بيتهيألي هيقتنع بشوية بوسترات و كام ندوة على كام حوار تليفزيوني .... طبعاً مفيش جدال فيه عدد ممكن يقتنع بس مش النسبة اللي تذكر.... مش الرقم اللي ممكن نحط جمبه علامة % من المدمنين .... مش النسبة على الإطلاق اللي يتصرف عليها كل المبالغ المالية دي .... و على رأي الحاجة أم سيد الله يمسيها بالخير " اللي معاه جنيه و محيره ... يجيب حمام و يطيره " ...

ما اعتقدش على الإطلاق أن المتاجرين في المواد المخدرة و اللي بيبيعوا الإدمان بكل صوره للشباب ممكن إنهم يستجيبوا لحملة الداعية عمرو خالد ...

مش بالبوسترات و لا بالندوات .... الموضوع اتقلب لقعدة ساعة عصاري مش دعوة لترك الإدمان .... كان الأولى أن تكون الحملة دي موجهه لرأس الأفعى مش ديلها .... إن تكون الحملة لكشف تجار الموت + علاج المدمنين ....

إن الموضوع و الأستاذ عمرو خالد هو اللي مقترحه كنت متوقع يبقى ديني بدل مهو كلام عادي و السلام ..... إن الموضوع ما يبقاش حكراً على عمرو خالد لوحده ... لكن عمرو خالد بنفسه يسعى لضم شيوخ الإسلام و الدعاة المعروفين و المحبوبين في كل أنحاء الوطن العربي لحملته ....

مش قادر اقتنع إن الحملة ممكن تجيب نتيجة على الإطلاق .... مش بوستر .... كل لقاءات عمرو خالد على الفضائيات كانت للترويج للحملة ‍‍‍‍‍!!!!! ..... طيب و بعدين ..... بعد ما الشباب المجاهد طبع البوسترات و علقها على حيطان مصر من أول بيت عم عثمان في حلايب و شلاتين لحد بيت عم بدوي في مرسي مطروح ... بعد ما البوسترات غطت الوطن العربي و اتحطت شعار لجامعة الدول العربية و لبنان قبلت بالتهدئة و انتخبوا رئيس ليهم .... بعد ما كل كلية بقى فيها بدل الندوة ألف عملها الشباب ..... بعدين ؟؟؟؟

مش عارف برضوا هو المدمنين دول شباب بس ... لو كده يبقى تعريف الإدمان عندهم غلط بقى .... عم شعبولا نفسه تقريبا كده من شكله باين عليه مدمن..... الكبار مدمنين أكتر و أكتر و أكتر .... بل فيهم أصلا اللي بيجيب السموم ....

فلوس ببترمي على الأرض ... حملة غير مجدية على الإطلاق .... كام واحد بطل تدخين بسبب التحذيرات اللي اتحطت على علب السجاير ..... كام واحد بطل يدخن بعد ما كبروا مساحة التحذير و حطوا صور واخدينها من أفلام الرعب ...... الصورة و قدروا يغطوها و تنام في سلام ...... كام واحد بقى بطل لما غلوا سعر السجاير ؟؟؟؟ .....

يا ترى كام واحد هيبطل يدمن أو هيضطر يروح لمصحات العلاج لما ما يلاقيش المخدر اللي هو محتاجه في السوق .... و كام واحد هيبطل لما نقول ليه .... يا وله كخ كده عيب ..... لا لا لا إخص عليك إخص ।

أنا عارف أني ممكن ناس من أنصار الأستاذ عمرو خالد يزعلوا مني ... أنا برضوا بحبه ... بس ده رأيي الشخصي.

حملة حماية طلع ملهاش علاقة بالتفاح الأمريكاني !!!!!

أشي كده من كام أسبوع كنت رايح الكلية ... كنت لسه راجع من المنصورة من البرلمان ... لقيت واحد زميلنا في الإتحاد من اللجنة الاجتماعية بيعلق ستيكرز على الحيطة ... طبعاً أنا خدتني الحمية و عملت فيها الدكتور ماجد جورج في زمانه و استليت لساني من غمده و صحت في هذا الفتي .... ماذا دهاك يا فتي ؟؟؟ بأي فعل تأتي على مسمع و مرأي من الجميع ؟؟؟ .... رد عليا زميلي الفتي بتلت لسانه اليمين و قالي و هو فرائسه بترتعد ... أجري ياض يا درش ... طبعاً أنا ثرت – من الثورة العرابية – و ثارت حميتي – من الثورة الناصرية – ما أنا ما حدش قالي كده قبل كده ... هو فاكرني بلعب معاه جولف في بورتو سخنه علشان يقولي "ياض"... فقلتله .... أي جريمة نكراء ترتكبها أيها الأحمق في حق الوطن ..... أي جريمة ترتكب في حق مصر .... ويكأنك لم تشرب من نيلها ... إذا هل تراك فكرت تغنيلها ؟؟؟ ..... و مصر مصر تحيا مصر ....

لا لا لا بجد ... قولتله يا ابني لو حد من الكلية شافك و أنت بتعلق ستيكرز على الحيطان هيودوك مارينا في عز التلج ... عايز تلزق حاجة يبقى بالسلوتب ... أما الستيكرز بتبوظ الحيطة لما تيجي تشيلها بعد كده....

بعد الليلة دي كلها و بعد ما أبدى الندم و باس الجدم على غلطته في حق القمم ... اللي هي الكلية و حظرتنا ... قولت بقى أما أبصلي بصة خاطفة على الستيكرز دي ... يمكن تكون للنينجا تيترز و فيه صورة فيهم لدوناتلو فقلبه في واحد ... ولا يكون صورة تخل بالآداب العامة و تخدش حياء الحمير فأشيلها و أخليها معايا و أتحمل عن زملاتي الذنب .... و لا يمكن تكون لا قدر الله لا قدر الله حاجة تخل بالأمن و السلم العام و تدعو لمناهضة نظام الحكم و تتآمر على مصالح الدولة العليا ... ساعتها ألحق أتصرف و أجري من جنبها أحسن أتقفش ....

أوم إيه بقى أوم ايه ... ألاقي الستيكرز دي عن حملة حماية .... حماية و ستوب ... طب حماية إيه يا عم؟؟؟ ... ما اعرفشي .... طب عن إيه يا بابا أنت يا بابا ..... ما خبرش ..... طب مثلا هيوزعوا فلوس أروح أحجز عند مين طيب ... راح عامل زى مني زكي في مسرحية كده أوكيه و عوج شفايفه و قالي " و أنيش درانييي" .... لأ لأ ينفع ... هو الواد ده أمن مركزي و لا ايه !!!

شوية و كام يوم كده لقيت مرسوم على البوسترات صورة تفاحة اللي هي بتبقى في القاموس مرسومة جنب كلمة Apple .... و جنبيها كف مفرود على آخره ... قولت يمكن تكون الحملة دي لحماية التفاح الأمريكاني من المبيدات المسرطنة !!!! ... يبقى أكيد الكف ده خمسة و خميسة في عين اللي ما يصلي على النبي علشان الحسد ... ما تقولوا عليه الصلاة و السلام..... بدل ما نقاطع المنتجات الأمريكية و التفاح الأمريكاني دلوقتي هنحميهم كمان .... لأ و فيه سبونسرز كمان ... يا خونة .... و قال إيه ... منهم الأمم المتحدة .... سلمت لأمريكا يا بوكيمون أنت ... أنا قولت برضوا .... بكره هيلحقك سابق و لاحق ... اللعنة على كوريا الجنوبية .... و فيه من الرعاة كمان القيادة العامة لشرطة دبي ... أمال إيه ؟؟؟ ما عندهم القواعد الأمريكية... فيه إيه يعني لما يساعدوا التفاح الأمريكاني كمان ..... و بعدين فيه تحت في البوستر لينك لموقع الداعية عمرو خالد .... يووووووه يا عم عمرو .... مش معقول علشان أتكرم في أمريكا يتصدى هو للدفاع عن حملتها لحماية التفاح الأمريكاني ...

روّحت بيتنا العزيز و قعدت على النت أدور على معلومات بقى عن التفاح ده ... يمكن يكون تفاح من غير ستيكر "فاخر" اللي بتضايق منه .... و لا يمكن يكون تفاح من غير دودة زي بتاع الأفلام الكارتون ... حماية إيه بس ...

و الحمد لله وصلت لموقع الحملة الدولية لحماية التفاح الأمريكاني من المقاومة العراقية و الأفغانية و البتنجانية .... طلع قال إيه قال إيه قال آه .... أييييييييييي ..... يا حوستي .... يا ليهوييييي .... ده ده ده موقع لمكافحة الإدمان .... ألحق استخبى تحت السرير يا واد يا درش ..... أرمي الشاي بالقهوة باللبن من أيدك ده مليان كافايين ....

مفيش كام يوم لقيت البوسترات بتاعة الحملة ملت البلد ... و كام معرض على كام ندوة ليهم في الجامعة عندنا .... و أشي تشيرتات بيضا زي الشمع تقولش مغسولة ببرسيل بكرات اللحوسة الدهبية ... واحد يقولي الشمع لونه بيبقى أصفر بس هما بيقولوا كده و خلاص ... و مش كده و بس .... لكن المفاجأة العظيمة لقيت كمان فيه أغاني معمولة للحملة بكل أنواع الموسيقى .... في راب بتاعة السمكرية اللي بيقعدوا يتخانقوا مع الكاميرا دي ... ايوه زي أمنيم eminem... و فيه كمان عمرو مصطفى بطل خناقاته مع كل الوسط الفني و عمل أغنية لمكافحة الإدمان .... و كمان الداعية عمرو خالد تقريبا عجبته أغنية شعبولا اللي كانت دعوة للإصلاح و ترك الإدمان لما غني و قال " هبطل السجاير و أكون إنسان جديد و من أول يناير هروح أشيل حديد ... " .... و لأن شعبولا بعد ما غنى و قال انه هيشيل حديد ... و من ساعتها و سعر الحديد في الطالع ... يعني تتربى في عزو يا شعبولا .... عز عمرو خالد محدش يفهمني غلط .... أثبت شعبولا بالدليل القاطع البتّار إن أغانيه كلها ليها تأثيرها العظيم في الحياة المصرية .... فاختاره بقى عمرو خالد علشان يغني أغنية للحملة بستايل شعبولا المميز و كمان من غير "و اييييييييييييييه " ... و ياللى أنت ماشى ومتخدر، لازم تفكر وتقدر، نصيحة منى لوجه الله، بلاش تآوح وتكبر، ده عمرو خالد وصاني، وقال كلام أنا بكاني، وقال لي غنى لأهل الخير، يمكن يتوبوا من تانى! .....

و الموقع بتاع الحملة بقى إيه .... فظيع فظيييع يعني .... إذاعة داخلية و صوت أتنين من الشباب يشتغلوا وش في الإف إم و على فكره البنت ممكن كمان تغني ... و فيه كمان مكان لقوايم الشرف للشباب اللي شارك في الحملة ... و سجل للإنجازات ..... و لقاءات للداعية عمرو خالد بقى في الفضائيات و المجرات الأخرى .... يعني كمان آي تي E.T. زمانه بيتفرج على الحملة و بيشارك فيها.... و لأ و إيه كمان في خبر أن مجلس الوزراء وافق على رعاية الحملة في مصر .... و على الرغم من أن الخبر تم تكذيبه إلا أنه لسه محطوط في الموقع!!!! ..... يتبع إن شاء الله في القريب العاجل .... قوي

الخيرة فيما اختاره الله

بسم الله الرحمن الرحيم

{ قل لن يصيبنا إلا ماكتب الله لنا هو مولانا وعلى الله فليتوكل المؤمنون } [ التوبة : 51 ]

{‏‏وَمَا تَشَاءُونَ إِلَّا أَنْ يَشَاءَ اللَّهُ رَبُّ الْعَالَمِينَ‏}‏‏ ‏[‏التكوير‏:‏ 29‏]‏

{ ما أصاب من مصيبةٍ إلا بإذن الله ومن يؤمن بالله يهدِ قلبه } [ التغابن : 11 ]

صدق الله العظيم

شايلَبَنبُن .... الوصفة السحرية للسهر أيام الإمتحانات

بما إن الإمتحانات قربت و خلاص الوقت بيجري و احنا بنجري وراه.... و يوم الإمتحان سيكرم المرء أو يتهان.... ف النهاردة أنا جايب وصفة رائعة لراغبي التفوق و الدح و الذي منه ...

طبعاً الامتحانات قربت جداً ... و فيه ناس كتير بتحب تسهر و الشاي من زمان ما بيأثرش , و القهوة و مشتقاتها بقت بتنيم مش بتصحصح !!!! .... مهو حتى الفساد وصل للقهوة و الشاي زي ما وصل للإقلام الجاف الماليزي اللي بتخلص في ثانية ....

علشان كده أنا فكرت أقدم المشروب ده في كافيتريا " دوشة درش للمشروبات السريعة" ...

هو مش أنا اللي مبتكره... الحق يتقال يعني .. .. بس لياالفخر أني أدخلت عليه تعديلات جوهرية للوصول للأثر الفعال ليه ....أيام و ليالي و أنا جوه معملي بجهز الخلطة السرية دي ... سهر وتعب و عرق و فيبكس علشان ما أنطردش من المعمل .... لحد ما في النهاية و صلت للوصفة السحرية للسهر اللا نهائي ...

ياللا هات ورقة و قلم أو أطلع باللاب توب على المطبخ ....

1. أنت دلوقتي تدخل المطبخ بتاعكم ...ويفضل انك تدخل برجلك اليمين ... و رجلك تكون غاسلها لزوم النضافة الشخصية ... ماشي يا عم ..

2. عاين مقدار نص كباية صغيرة و حطه في الإناء اللي هتغلي فيه المية مش هتفرق قوي إن كان براد شاي و لا كنكه ..

3. حط مقدار الشاي اللي بتعمله في الحقيقة لوحده في الإناء اللي اتفقنا من شوية إنه مش هيفرق كتير إن كان براد شاي و لا كنكه) يفضل نص ملعقة صغيرة ) و كمان معلقة بن صغيرة أو معلقتين و شوية أنت و رغبتك ... و قلبهم كويس مع المية قبل ما تحطهم على النار .

4. الكباية بقى دي أهم حاجة و هي هتبقى آداة الجريمة .... حط فيها السكر حسب رغبتك بالكمية اللي تحبها... و على السكر أملأ لحد نص الكباية لبن…. يفضل اللبن الصابح ....

5. الشاي بالبن المغلي حطهم على اللبن و قلبهم كويس لحد ما يدوب السكر في اللبن ..

6. استمر في التقليب حتى سماع صوت الصفارة .....

7. أشرب المشروب السحري ده على طول لأنه هيبقى حرارته .... 40 درجة تقريبا ......الشرب بالفم بالطبع مش الأنف.... الفم اللي هو ساعات بيبقى بق و في البلد حدانا بيبقى حنك ... و يعرف في بعض بلاد الفرنجة بالماوس ...

8. المشروب ده طعمه رائع جداً جداً ما تخافش.

9. أقعد ذاكر و أدعيلي .

نصائح هامة جداً

1. لو عندك إرادة جامدة ممكن تكتفي بالبن و الشاي من غير لبن ...بس ده هيضر المعدة شوية.

2. لابد ألا تكون ممن يعانون من قرحة المعدة ...

3. لو كنت شارب شاي أو قهوة أنتظر ما لا يقل عن 5 ساعات قبل شراب هذا الاكسير .

4. يكتفي بكوب واحد يومياً ... كوباية صغيرة ... لأن كترته قد تسبب تقرحات في المعدة .

5. لن يعمل الشراب بنجاح إذا لم تدعي ليا ربنا يوفقني في الامتحانات و أدخل الشفوي على طول و أتسأل في الأجزاء اللي أنا مذاكرها بس ....

6. تم إطلاق اسم " شايلبَنبُن " على المشورب بواسطتي ..

يا ريت أنا أقوم أذاكر علشان كده ما ينفعش خالص بقى ...
و بالهنا و الشفا و مترح ما يمشي يجري

الإضراب اللي يجيلك منه الريح ... قاطعه و استريح

يووووووه ... حتى ده كمان مهوش نافع ... طب أنا أعمل إيه طيب ؟؟ ... كل الحلول غير ممكنة ... و كل الطرق مابقتش تودي على روما زى الأول و لا حتى للسمبلاوين .... قولت أنزل على معاد السكشن بالظبط مش نافع ... أروح قبليه مش نافع ... أروح بعد ما يبدأ و أضيع البهاريز و الدرر اللي بيقولوها المعيدين في أول السكشن برضوا مش نافع ... زى ما قال عم سعد زغلول .... مفيش فايدة ..... أيوه الله مفيش فايدة... مواصلات تغم النفس ... و لا فيه مكروباصات و لا حتى MCV طب أعمل إيه ؟؟؟ أروح بتك تك !!! ده بقى أغلى م التاكسي !!!!و لا أشتري مكروباز بالقرشين اللي أهلي محوشينهملي انا و أخواتي و بلاش أتجوز!!!!

و اللي يشل بقى أن يوم الحد قالوا إن فيه إضراب ... قولت عال عال و الله ... كده أروح وقت ما انا عايز ..... أخيراً هيبقى فيه يوم زى يوم السبت ساعة ما أروح للفتحة "موقفنا الغير شرعي" ألاقي مواصلات على طول كده !!! ...... و مش هركب أربعات .... علشان السواق غالبا بيبقى وطني و لازم كل يوم يركب أربعات علشان يحسسنا بتلاحم قوى الشعب العاملة .... سواقين من أيام الإتحاد الإشتراكي ...

نزلت من بيتنا و أنا أدعي للإضراب و يا رب كل واحد في بيته يدنه كده طول السنة و يرفع العلم ... خلي اللي بيبيعوا أعلام مصر يسترزقوا بقى ... مفيش اليومين دول ماتشات للمنتخب ... و الماتش الأخير الناس حتى ما راحوش علشان الحضري ..... خلاص بطلوا يتفرجوا على هز وسطك يا حضري ..... من النهاردة ماترقصش تاني يا حضري .... الجماهير بقت متدينة .....

روحت الموقف عيني ما تشوف إلا الضلمة ... خاب أملي كالعادة ..... قال إيه ... الناس واقفة و مفيش مكروباصات .... يوووووه ..... حتى السواقين عملوا إضراب !!! مش وقته يعني ... ودوني إمتحان البايو و اعملوا الإضراب براحتكم ......

طلع الحمد لله إن السواقين تقريبا ما يعرفوش يعني إيه إضراب و إن المواصلات زحمة زي كل يوم و السواقين بيحملوا من بره بره و يلفوا قبل ما يوصلولنا ... يا خلابيص ....

وصلت الحمد لله لحرم الكلية المصون بعد ما ركبت من عند المطحن بعد مسيرة ألف متر و خناقة على الباب و لا أكننا بنلعب الراجبي اللي بيموتوا فيها بعض دي ... حصة ألعاب ع الصبح كده ... لأ و أول ما وصلت الكلية حي أرزق كامل الأطراف ..... التنفس منتظم ..... ضغط الدم كالعادة مش عارف أحدد عالي و لا واطي .... لقيت الواد الاشتراكي الرأسمالي اللي مش قادر ارسى ليه على بر بعلو صوته ف وسط الكلية بيقول " إيه ده يا درش ... أنت لابس غامق ليه ... حتى انت مشارك في الإضراب !!!!!" .... أبص حوالية قال ايه كل الكلية بتبحلق فيا و كلهم عينيهم هتخرمني من كتر البحلقة ..... يا نهار ألوان ... قولت مفيش غير حل واحد ... و بمبدأ علي صوتك بالغنى و لسه الأماني أن الخبر ما يتسربش ممكنة ... اديت تعليماتي للمخرج أنه ينزل بكليب " الحزب الوطني في مصلحتك و المستقبل ليك .... كل شباب مصر هيشتغلوا و بكره تشوف بعنيك " .... و بدئت الهتاف بعلو صوتي ... "مصر يا يعيش يا يعيش .... الحزب الوطني يا يعيش يا يعيش ... لؤي يا يعيش يا يعيش ... "

و الله ما كان في دماغي خالص و أنا نازل أن اللي هينزل من بيته ياريت يلبس غامق ... أنا لبست و لا أدري لماذا لبست و لكنني لبست و خلاص غامق ...

طلعت السكشن و كل واحد يقابلني على السلم يحييني أني لابس غامق و مشارك في الإضراب ....

لما دخلت السكشن قولت لما أعمل كده مسح تعدادي عليهم ... لقيت الخلق هي هي بالظبط ... ده فيه امتحان هيتحل في الورقة البمبي اللي ف آخر مذكرة العملي يا بابا ... يعني يتحرق الإضراب و أهم حاجة الامتحان ... و الإخوان حتى حاضرين السكشن و كله تمام ... أنا اعرف ما شاركوش في الإضراب ليه ...على الأقل يقللوا الكثافة السكانية في السكشن ..... شكلهم خافوا على نفسهم المرة دي .... قالوا الإضراب اللي يجيلك منه الريح ... قاطعه و استريح .....

سبحان الله كله عادي كده ... و قال ايه واحد بيه نسي مصر و الغلا و الزحمة و رغيف العيش أبو شلن المدعم و الطوابير اللي قدام شبابيك التذاكر في السينما و أن الكافيار سعره ذاد خمسة و تلاتين قرش و مصر يا سعاد مصر و قال إيه قال إيه ... بيسأل الدكتورة المعيدة عن الامتحان بتاع النهاردة عليه كام درجة؟؟؟ فاضله 4 درجات ع الإمتياز و بيسأل على امتحان اعمال سنة عليه كام درجة ... يا أروبة ... أمشي روّح ياض ... مصر بتتأخر كل يوم بينا و انت بتدور على 4 درجات علشان الامتياز ... ماله النجاح بـ67 % ... مجموع نكسة تمام يعني ... بس و الله برضوا مش هتنحى .... الجماهير العريضة خرجت م الساكشن تهتف بعلو صوتها ..... تيييييييت تييييييييييت – حذفت بواسطة الرقابة على المصنفات الفنية – يا درش لا تتنحى ... أكسف الجماهير العريضة ...

عدى السكشن على خير و نزلت لقيت الكلية كاملة العدد و الحمد لله !!!
يا نهار أبيض !!!

طب و الإضراب !!!

و لا حس و لا خبر !!!

مفيش من مظاهر الإضراب غير اتنين كانوا بيضربوا بعض بهزار جنب أوضة الاتحاد اللي تحت بير السلم !!! ..... يعني حتى بيضربوا بهزار مش بجد ... شفت إنعدام الوطنية وصل لإيه !!!

دنيتني مستني لآخر اليوم يمكن تخرج مظاهرة من الجامعة و لا حاجة أروح أطلع فيها بيقولوا بيوزعوا في المظاهرات عصير فريش في الصيف .... ده غير ممكن أطلع في التفليزيون و الجزيرة طبعاً مستنية على الكادر و ساعتها ممكن ألاقي مخرج يختارني علشان أقوم بدور سلعوة في فيلمه الجديد ..... ولا ممكن أطلع في الدستور و لا المصري اليوم بقى و ده يبقى يوم المنى ..... بس برضوا لحد آخر اليوم ما حصلش حاجة ...

قولت خلاص أشد الرحال على البيت بقى أنا و زميلي الشاعر العظيم و زميلي التاني اللي طول الوقت خايف ( يتبقلش ) !!!! ...... إلا و النبي يعني ايه يتبقلش دي ؟؟؟

المهم و احنا خارجين لقينا عربيتين أمن مركزي بيقوموا بدور أسدين قصر النيل عند الجامعة ... و بتوع السرفيس بقى بما إن الدنيا بدئت تضلم كل واحد فيهم مشغل السارينة .... ظاراعة ظاراعة ظاراعة .... ظاراعة و فاضي ظاراعة .... والتاني ... محطة محطة محطة .... محطة و فاضي محطة ...

قولت ما بيدهاش و روحت على التباع بتاع السرفيس و قولتله ... " إلا قولي يا أونكل, هو فيه مظاهرة عند المحطة؟" ... الراجل بقى نسي السرفيس أنه لسه فاضي و نسي المحطة محطة محطة فاضي محطة و بطل يبصبص للي رايحة و اللي جاية .... و حط ديلة في سنانه و قال يا فكيك .....

طبعاً ما حصلش و لا مظاهرة و لا بتاع عند المحطة ..... الحمد لله الشراقوة طلعوا مواطنين صالحين و نزلوا إلى العمل بجد و اجتهاد و رفضوا الدعاوي المغرضة بالإضراب و الإضرار بمصالح الوطن ... ده حتى اللي بيسافروا بطلوا يسافروا علشان ما يعملوش الزحمة المعتادة كل يوم عند المحطة ...

و طبعاً الإضراب فشل فشل زريع ..... و ده كان طبيعي في ظل إضراب مش متحدد ليه أهداف أو حتى مطالب ..... إضراب طلع من العدم و راح تاني ينام في حضن العدم ......

إضراب مصر ما خدتش منه غير بلاوي المحلة اللي لا عارف يفلح في الدوري و لا الكاس و لا عارف يفلح في الإضراب حتى ..... تكسير مدارس و محلات و سرقة و نهب لناس ملهاش ذنب في حاجة .....

بالذمة ايه اللي الناس استفادوه لما أضربوا و كسروا و سرقوا و نهبوا ..... ربنا يعوض على أصحاب المحلات و العربيات و الأتوبيسات و خاصة المرسيدس ..... و عقبال بقى ما يلاقوا مدارس جديدة للطلبة اللي مش هيلاقوا مدرسة يتعملوا فيها ..... فعلاً إحنا شعب غير ناضج سياسياً و مش عارف يعيش و لو مرة منظم و لا حتى يتظاهر بشكل حضاري ...

كل إضراب و انتم بخير ... انا سامع ان فيه إضراب تاني قريب ... تقريبا عندي برضوا أمتحان بايو :)

بفلوسك أو بدمك ... الهم أنك تتبرع

تعاطفك لوحده مش كفاية ... أتبرع و لو بصوتين ... ده كان شعار الحملة الانتخابية بتاعي السنادي لما كنت داخل الانتخابات .... بسم الله ما شاء الله يعني و لا قول إلا بالله ... كسبت الحمد لله .... كان يوم خميس أنا فاكر و النتيجة ظهرت الساعة 5 و خمسين دقيقة ... كان يوم خمسة نوفمبر ... خامس يوم ف الشهر ...

المهم يعني الشعار ده بقى قصته إيه بقى يا واد يا درش يا مزعج ... دي كلمة بقى للتاريخ ... يعني على تلات حلقات مع عماد الدين أديب ربنا يديله الصحة .. ده مقتبس من شعار مستشفى سرطان الأطفال 57375 لعلاج الأطفال مجانا ... يعني من غير فلوس ... يعني For Free لو ثقافتك فرنساوي زيي...

أوووم بقى ايه ... احنا كنا المفروض نتبرع كتير بقى لبتوع المستشفى دي .. لكن للأسف المستشفى دي ليها ناس كتير بتتبرع ربنا يذيدهم و يبارك في فلوسهم يا رب – زي ما قال لينا دكتور عندنا في الجامعة - و يبعد عن عمنا الدكتور يوسف والي و الضرايب مصلحتي أولا ...

طلع أن فيه في مستشفى اسمها صيدناوي ... ايوه اللي بين مدينة العبور بتاعة البنات و استاد الجامعة ... في قسم الأورام و الغسيل الكلوي بقى أطفال محجوزين ف القسم و ممنوع يروحوا بيوتهم!!!!!

ايه حكايتهم بقى دول ؟؟؟!!!!

حكايتهم أن الأطفال دول فقرا جداً ... بيحتاجوا لنقل دم بكميات كبيرة جداً ... و طبعاً أهلهم أتبرعوا ليهم كتير قوي و مش بينفع يتبرع الواحد العادي غير كل 3 شهور ... الأطفال ما بقاش قدام أهاليهم غير حاجة من اتنين ... يا إما يجيبوا حد من بره يتبرع ... يا إما يشتروا الدم ده من المستشفيات ...

طبعاً كيس الدم بشيء و شويات ... و العين بصيرة و الأيد قصيرة .... بقى كل طفل مديون بكام كيس دم ... و المستشفى راسها و ألف حذاء " أو ما يرادفه من معنى " ما تخرجهمش غير لما يسددوا الدم اللي عليهم ...

بالزمة ينفع طفل يتحجز في المستشفى لحد ما يسدد الدم اللي عليه؟؟؟!!!

طبعاً المستشفى معزورة ماشي ما قولناش حاجة خالص يعني ...مهو الحكومة هتوفر لمصر كلها دم منين يعني ؟؟؟ ... لا بيتزرع و لا بيتصنع و لا بنستورده من بره ... كله تبرعات محلية الصنع ... Made in Egypt ... ما بنقبلش الهبات الدولية ..... دم المصريين الانقى في العالم ... بره ما بيكلوش فول ... طيب ليه إحنا يا شراقوة بدل ما أمالين نتبرع ل 57357 ما تنبرع للأطفال بتوع صيدناوي دول ... ده الأقربون أولى بالمعروف ... و اللي تحتاجه صيدناوي يحرم على 57357 .... الأمر بسيط و الله ...

معاك فلوس روح سدد تمن الدم اللي على الأطفال دول ... مش معاك فلوس يا سيدي سهلة ... روح اتبرع في مستشفى الجامعة بالاسم لواحد من الأطفال دي ... و مرة في مرة أنا و أنت و زملاتي و زملاتك بيتهيألي هنقدر نفك زنقة الناس دي ... و اللي يفرج عن مسلم كربة من كرب الدنيا ... ربنا هيفرج – بإذن الله – عنه كربة من كرب يوم القيامة ...

و خد بالك بقى ... لما هتتبرع بدمك مش هتخسر حاجة يعني ... جه الوقت اللي تثبت فيه للعالم أن عندك دم ... مش قصدي أشتمك ... انا قصدي عندك دم كتير يعني ... مش هتخس و لا حاجة ... مش هيجيلك أنيميا ... مش هيغمى عليك و انت واقف مع الزميلات الفاضلات... ده هيجددلك دمك و هتبقى ولا هكتور بن بريام العظيم ... بس مش هتتغلب من أخيلس ... عضلات ايه و قوة ايه ... بص م الآخر لازم تروح تتبرع يا بفلوس يا بدم .... يا أخي لن تنالوا البر حتى تنفقوا مما تحبون ... ياللا بقى فيه أطفال نفسهم يروحوا بيوتهم و حرام عليك لما تبخل عليهم بحق بسيط زي ده ... ده طفل يا كابتن انت ... خليه يشوف كام يوم حلو يصبره على مرضه قبل ما يكبر و يشوف الدنيا على حقيقتها ....

خلاص ناوي تتبرع ؟؟؟؟

أنا هنزل ليك هنا ملف داوونلوده على الكمبيوتر و هتلاقي فيه كل الأسماء بتاعة الأطفال و عدد أكياس الدم اللي عليها ....

أضغط هنا بقى لتحميل الملف بالاسماء