السبت، 6 فبراير 2010

رفعت اسماعيل ...... آخر!

كنت قاعد من تلات تيام أو يومين كده على الفيس بؤ لا بيا ولا عليا كافي خيري شري ... لا بضايق في حد ولا حد بيضايق فيا.... بحاول ألاقي حل عملي للخلاف اللي حصل ما بين سوريا و اسرائيل و بيهدد بحرب على الجبهة السنغالية .... وإذ فجأة مرة واحد بدون مقدمات وأكيد برضوا بلا مؤخرات لقيت اليوزرنيم بتاع الدكتور احمد خالد توفيق الله يمسيه بالخير بيتكلم عن المخرج عمرو سلامة مخرج فيلم زي النهاردة .... باعتباره أول من قدم شخصية العجوز حبيبي الدكتور رفعت اسماعيل في السينما ....
طبعا أنا ازبهليت و استغربت و اتعجبت واندهشت و اتشقلبت و اتصدمت .... أكيد بعد ما اتشقلبت لازم اتصدم!!!!!

أزااااااااي أنا ما سمعتش ولا قريتش ولا شوفت ولا أي حاجة عن الموضوع ده !


!!!!!

تبا لي تبا لي !!!

روحت جري جاري على الفايرفوكس وافتح يا عم درش الجوجل ودور على فيلم زي النهاردة أو زي امبارح مش فارقة ... المهم أني لقيته ونزلته في ساعة كده ...


طبعا كان الوقت متأخر قولت ده فيلم رعب و بتاع بقى ومش هينفع كده يتشاف دلوقتي وانا عايز انام اصلا
استنيت تاني يوم


اللي هو الجمعة .... الدنيا بالليل الساعة 10


الدنيا ضلمة


بدئت اتفرج ع الفيلم


فاتت اول ربع ساعة ومفيش رفعت إسماعيل

فاتت تاني ربع ساعة


مفيش برضوا رفعت إسماعيل

ايه الاحباط ده !


لكن تالت ربع ساعة


ياااااااااااااااه

اخيرا








اتأكدت ان مفيش فيها برضوا رفعت إسماعيل
:)


المهم ان في الدقيقة 47 كده وشوية ثواني على كام جزء من الفمتوسكند ظهر عبد العزيز مخيون






وطلع للأسف مش عامل دور رفعت إسماعيل
!!!!!!!!


قولت هكمل الفيلم يعني هكمل الفيلم


مهو مش معقول الدكتور احمد خالد هيغلط مثلا في اسم الفيلم .....

لحد ما حصلت المفاجأة المرتقبة

ومحدش يتذاكي في اللحظات الحاسمة دي ويسألني أزاي مفاجأة وأزاي مرتقبة

الدقيقة 59 من الفيلم


الثانية 42


أول مرة تيجي سيرة الدكتور رفعت اسماعيل

قولت بسسسسسس


هيبتدي الشغل


وهيظهر العجوز الرائع المذهل د.رفعت إسماعيل علشان (يشعل فتيل الاحداث) ... على النيعمة انا بكتب كلام جامد وزي الفل.


فات م الفيلم ساعة و 52 ثانية



ظهر الرائع د.رفعت إسماعيل











ويا ريته ما ظهر
:(

طبعا رفعت إسماعيل اللي ارتبطنا بحكاياته في سلسلة ما وراء الطبيعة و رفعت إسماعيل اللي ظهر في الفيلم العلاقة ما بينهم بتتمثل بس ....... في الاسم ! أما بقى الشبه و طريقة الآداء كانت زي الفرق ما بين العنكبوت ودكر البط البلدي:(


للأسف الأستاذ شريف سلامة هو صاحب القصة وهو في نفس الوقت المخرج .... ودي حاجة بيتمناها أي مؤلف روائي علشان يحول قصته لفيلم


و كون إن الأستاذ شريف سلامة الله يسامحه بقى يدخل رفعت إسماعيل في شخصية في الفيلم فده دليل أكيد على انه من المعجبين بشخصية بطل روايات الدكتور احمد خالد توفيق


وكان الأولى بيه انه ينقل رفعت إسماعيل اللي في الروايات للفيلم بدون أي تغيير ....!


مش يتلخبط وينقلنا شخصية الحاج أبو ست الدكتورة ماجي !

طبعا الفرق واضح ويضايق

د.هناء عبد الفتاح اللي قام بدور رفعت إسماعيل أولا من حيث الشكل غير ملائم تماما .... رفعت إسماعيل شكله وملامحه ملامح فلاحينا في الشرقية ملامح مصرية ... أما الدكتور هناء فملامحة تميل أكتر لملامح الفرنجة في بلاد العجم ! ثانيا احنا كلنا عارفين ان رفعت إسماعيل من غير ولا دقن ولا سكسوكة .... في الشباب كان شبه كمال الشناوي وهو صغير و في الشيخوخة اه ممكن يبقى فيه شبه شوية من عبد العزيز مخيون ....بس طبعا بعد شوية تعديلات في الصلعة


وعلى فكرة فوت المخرج شوية حاجات بسيطة جدا زي العوينات ماركة قعر الكوباية ... طبعا العوينات اللي هي النضارة بس في قاموس رفعت اسماعيل !


وكمان يا سلام بقى لو كان فيه البدلة الكحلي اللي بتجعله فاتنا قوي دي :)


نيجي للآداء


اعتقد بشدة وعنف إن الأستاذ الرائع عبد العزيز مخيون كان اقدر على تجسيد دور رفعت إسماعيل اكتر من الدكتور هناء ببساطة وهدوءه بدل الفذلكة و الميل للفلسفية في طريقة كلام الدكتور هناء في الفيلم !!!


متضايق جدا من التجربة دي

ما كنتش احب بطلي المفضل يظهر بالصورة دي


اتمنى في النهاية طبعا أن مشروع دكتور احمد خالد توفيق لظهور رفعت اسماعيل على السينما يكمل


وأتمنى اكتر إن يكون فيلم مش مسلسل

لان المسلسل مش هيلاقي إقبال عليه لأنه يفترض مسلسل رعب وفي وسط الزحمة اللعينة دي هيتظلم بجد

أما الفيلم فتقنيات التصوير فيه أفضل

و فيه قدرة على تلافي الأخطاء اللي ظهرت في أول فيلم خلال التحضير للجزء التاني


غير طبعا تقنية التصوير بتتطور في السينما من وقت للتاني فبتساعد في إخراج الفيلم بصورة رائعة

--------------

ملحوظة أخيره !

فيلم زى النهاردة بجد فيلم رائع جدا جدا جدا

ويمكن لو الشخصية بتاعة رفعت اسماعيل ظهرت باي اسم تاني كان الفيلم هيبقى تحفة

تحية للمؤلف والمخرج شريف سلامة باستثناء تقديمه شخصية د.رفعت إسماعيل طبعا قطعا ....

6 التعليقات:

أحمد شريف يقول...

شفت يا مصطفى دخلت تاني وبردك لسه مغيرتش العنوان
طب أعمل فيك إيه ؟
وبعدين أنا لا شفت الفيلم ولا بقرأ ما وراء الطبيعة

غير معرف يقول...

اخيرا حد لاحظ.......

فعلا عنكبوت وبطه بلدى

حصلى نفس الحاله السوداويه من الاحباط المتداعى
طبعا اول ما سمعت سيرة الدكتور رفعت قلت هيييييه اخيرا خش يا معلم وريهم الشغل ياكبير
وبعدين افتكرت ان عبد العزيز مخيون عامل دور تانى بس صبرت نفسى وقلت يمكن عامل دورين فى الفيلم؟؟؟ او لقوا وجه جديد-او قديم-المهم شبهه

ولما طلع الممثل واتكلم قلت لألألأ انتو اكيد بتهزروا وصرخت ياظلمه حرااااام طب ما عبد العزيز مخيون اهه مفيش نظر معكستوش ليييييه؟؟

اقصر-اتخن-دقن-وصلعه مش مظبوطه ودى مصيبه لوحدها-وبيتكلم عادى كده من غير ما يتريق ازااااااااى؟؟؟؟

قلت ياريتهم ما كانوا طلعوه

المهم الموضوع راااائع والمدونه تحفه

ربنا يوفقكم

توهة يقول...

ايه يا درش مافيش حاجه جديده

ولا الحياه شغلتك عن الكتابه


علي العموم ربنا يوقفك


تحياتي

غير معرف يقول...

جميل اخر حاجة............... بس

غير معرف يقول...

ثقافة الهزيمة .. عصابة البقرة الضاحكة‏ 2

فى مارينا مصيف الصفوة السياسية يقول أحد أفراد الأمن بالمنطقة أول فيلا هنا أتبنت كانت لإبراهيم سليمان وزير الأسكان السابق بعدها حدد الناس اللى تسكن المكان، خصوصا أنه أهدى علاء وجمال أبناء الرئيس السابق قصرين على بعد خطوات من فيلته، ثمن الواحد منهم يعدى الـ 40 مليون جنية ( حوالى 7 مليون دولار ) ومسجلين بأسماء هايدى وخديجة زوجاتهم.

و أستطرد: فى لسان الوزراء يسكن إيضا أحمد شفيق رئيس الوزراء السابق وهو عضو فى أتحاد الشاغلين بمارينا، والوحيد من الوزراء السابقين الذى جاء بعد الثورة إلى مارينا، و له فيلا يقدر ثمنها الآن من 15 إلى 20 مليون جنية ( حوالى 3 مليون دولار ) ونفس السعر لفيلا نائب رئيس الجمهورية السابق عمر سليمان .

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us


مصر كلها تتساءل لماذا لم يتم للأن التحقيق مع أحمد شفيق و عمر سليمان بشأن ممتلكاتهم؟

غير معرف يقول...

انا فعلا لقيت ان رفعت اسماعيل اللي احنا عارفينه واللي صورته علي كل كتيبات ما وراء الطبيعه مالوش اي علاقه بالشخص اللي ظهر في الفيلم ولا فى الشكل ولا في طريقه الكلام وبجد كان احسن يسيبوا شكل البطل ده لخيال القارىء بس فعلا شكرا لك علي المدونه وهى رائعه فعلا