شيء لا يصندقه عقلييييي ...
اللي فاضل من عقلي بمعنى أصح ...
ما كل اللي في سني دلوقتي بيحصلهم كده ...
خلاص البرجين اللي كانوا فاضلين في نافوخي من يوم 20إبريل أنضربوا هما كمان .... الدرس انتهى لموا الكراريس ...
إليكم هذا البيان الأسود العاجل ...
الموسيقى المرعبة بتاعة نشرة الأخبار بتاعة الفك المفترس دي ....
إنه في يوم الأربعاء الموافق 7 مايو 2008 كان المدعو درش قاعد في الكلية مع الواد سيكا النحال و كان المدعو درش – اللي هو المجني عليه = الضحية - حاطت أيده على خده بينعي نكبات الدهر لا بيه و لا عليه .... و إذ فجأةً إذ فجأةً يعني بجد لقى سلامة ... سلامة اللي هو محمد سلامة مش حسين رياض إنتي فين يا جهاااااااااد .... المهم – عفوا - نرجع لمرجعنا ... إذ فجأةً لقى سلامة بيقول ليه و كله تأثر و الدمعة هتفر من عينيه باكياً منتحباً ....
" ألحق يا واد يا درش ... في راسك شعره بيضا ...."
ايييييييييه !!!!!!!
يا لها من فاجعة !!!!
النهاردة السبوع .... ايوة ايوة ..... النهاردة السببببببببوع ..... لأ أرجوكم بلاش تعملوا فشار بيتعب القاولون و أنا أصلا الجهاز الهضمي مش ناقص .... بلاش ملبس أكيد سعره ذاد زي أي حاجة تانية .... بلاش شاكاليته بترفعلي الضغط .... شيلوا الرز بلبن من قدامي مش هقدر أمسك نفسي ...... هتعملوا سبوع على إيه .... على المصيبة .... على الفاجعة .... على الوكيسة اللي أنا بقيت فيها...। على الأمر الجلل "يعني الخطير" ..... أنا عايز أشلشلييييي ..... هتعملوا سبوع علي إيه ....
فاكر الأربعاء الحزين ده .... زي ما يكون أمبارح ... فاكر اللحظة اللي كنت هيجيلي فيها كونجيستيف هارت فايلير .... شعري بدأ يبيض .... فاكر يوميها .... أنا إترعبت و شعر أيدي وقف تقولوش أستاذ الدرندلي أكسيلينت مش أكسيلانت قال ليه stand up قوم فز قامت قيامتك .... عنيا طلعت مترين بره زى ما بيحصل في أفلام الكرتون تقولوش جيم كاري في فيلم القناع .... و وشي قلب ألوان و لا بيض شم النسيم اللي ساهم في النزلة المعوية .... لحق شعري يبيض ..... طب ليه و من إيه و يا ترى من أمتى ؟؟؟ ....
فاكر يوميها ما صدقتش .... قولت لازم أتأكد من أكتر من مصدر موثوق منه.... برضوا قالولي إن فعلاً فيه شعرايه بيضا ..... يمكن تكون مؤامرة من القوي الخارجية .... دخلت سألت أتنين موظفين حكوميين لا يقل مرتبهم – بعد العلاوة التلاتين في المية – عن 3859 جنيه و أتنين مليم أسود بنيله .... قالولي برضوا إن فيه شعرايه بيضا ....
قولت بلاش موظفين إما أتأكد من أي حد من العمال ... العمال الشقيانين الكادحين من أجل لقمة العيش .... لقيت تنت الحاجة بتاعة قسم م الأقسام مش عارف قسم إيه كده بتقف يوم النتيجة تاخد الحلاوة بالعافية .... قولتلها يا حاجة أنت زى ماما و مش غريبة يعني و في سن والدتي .... بصتلي كده من فوق لتحت لفوق تاني ... مركزتش تحت كتير تقولش شافت الجزمة مخرومة !!!! .... و قالتلي و هي ممتعضة – آه و الله كانت ممتعضة بس أكيد هي ما تعرفش إنها بكده بتكون ممتعضة – قالتلي "بقى أنا قد أمك " ... قولتلها معلشي بقى يا آنسة خليها علي المرة دي ... ابسطي بقى ده انتي خدتي العلاوة و العتبة على النظر ... قالتلي فيما معناه أني أقصّر و أجيب م الآخر بدل ما "تبقلشني" ... أبو صلاح بهت على كل الكلية ... قولتلها بصي يا حاجة ما تستغربيش قوي م الطلب يعني ... أنتي قريبة من سن والدتي .... و لسه بديها ضهري لقيتها بتقول : -
- "استغفر الله العظيم يا رب ... هي الدنيا جرى فيها إيه ... كله م اللي تتحرق بجاز الوصلة ...
- إيه يا حاجة ... مش ناقص بالله عليكي .... ما تفهمنيش غلط ... ده أنا بقولك أنتي قد والدتي ...
-أمال أفهمك أزاي يا ابني ...
- أفهميني صح ... يا حاجة انتي عارفة إيدك اللي بتاكلي بيها بالمعلقة مش بالشوكة ؟؟؟ .... الناحية اللي قدامها على طول من راسي ... و من فضلك مالكيش دعوة بقفايا... شوفيلي في شعر ابيض عندك ؟؟؟؟
- آه يا ابني فيه شعره بيضا حتى بالأمارة لونها أبيض ...
أديتها وشي تاني و سألتها إن كانت متأكدة ... أكدت ليا أن فيه شعره بيضا فعلاً .... قولتلها أحلفي و قولي و الله العظيم أقول الحق ..... حلفت بالله العظيم إنها بتقول الحق .... اتصدمت بقى و رحت زعلان بقى و كنت هعيط بقى و ألطم بقى و أتنيل بنيلة تاخدني بقى .... قولتلها يا حاجة هل لديك أقوال أخرى ؟؟؟؟ ..... ألاقي الحاجة دي بتقول ... مبروك يا ابني انك كبرت و عقلت و رسيت كده.... هات الحلاوة بقى عقبال ما أشوفك متخرج و معاك ضرس العقل ....
- حلاوة ايه بس يا حاجة ده أنا داخل على شيخوخة و زهايمر و دار مسنين و طقم سنان ..... و أنا لسه ما دخلتش دنيا ...
- يعني مفيش حلاوة كده ... ده أنا قد أمك ...
- دلوقتي قد ماما .... لا يا حاجة مفيش ... و على فكرة ماما أصغر منك على فكرة يعني على فكرة .... و سيبيني في حالي بقى ....
لقيتها مرة واحد تقولش شافت حد م المسئولين و قالت تفجر في وشه قنبلة دعوات .... " إلهي يولولوا عليك يا بعيد بدري ..... تصرف فلوسك ع الحكما بحق جاه النبي ..... لا تكسب و لا تربح في صحتك و لا عافيتك .... تخرج م الكلية دي على نقالة .... ألخ ألخ ألخ " ...
آه صحيح على فكرة ... ده الطبيعي بتاعها لما ما نديهاش الحلاوة يوم النتيجة ...... المفروض نديها سم فران مش حلاوة ... دي عايزة وحاشة مش حلاوة ... أنا نقصك يا شيخة ...
رجعت البيت و أنا لسه مش متأنكد قوي م الموضوع ده ... ممكن تكون اشتغاله ...استمرار لنظرية المؤامرة من أعدائي في اللجنة الإجتماعية في الإتحاد .... تكالب لقوي اللجنة الإجتماعية الغير عاملة اللي مش في اتحاد صيدلة على الطالب الغلبان .... مش قادر اقتنع بالحقيقة المرة ....
بصيت في المراية ما لقتش حاجة ...... طبعاً مش هلاقي هو فيه حد بيشوف قفاه !!!!! استخدمت مراية تانية و كانت الفاجعة و المصيبة النكراء .....
نعم يا سادة ..... لقد اكتشفت الحقيقة المرة .... فيه شعره بيضا عايزة قطم رقبتها في راسي .... يا نهار أبيض يا نهار أبيض ....
عملت إيه أنا في دنيتي علشان الميلانين يقل في راسي ..... لونت البيض يوم شم النسيم ؟؟؟ ايه المشكلة ما كل الناس بتلون البيض و مش بيحصل حاجة !!!!!
أكلت رنجة و سردين ..... ما الناس بتاكل فسيخ و مش بيحصلها حاجة ....
معرفتش أطلع الـunknown في الفايتو .... على فكرة ناس كتير قوي ما بيعرفوش يطلعوا الـunknown في امتحان الفايتو .... و بعدين مش ذنبي إن البورسلينه بتغرق في الووتر باس .....
لازم أستعد نفسوياً للأيام القادمة .... لازم اعترف و أقر بالحقيقة المرة و من غير تعذيب أو سحل و لا سلخ أو شفط أو بلع حتى ....
لازم أعرف أني مش هينفع أدخل في قصص حب إلى الأبد .... أنهار عواطفي الجياشة لازم أجففها ... هسلمها لوزارة الري و الموارد المائية ... هما أولى بيها مني في موسم الصيف اللي داخل .... أنقذ الناس العطشانين في اليومين اللي فاضلين ليا من عمري ... خلاص مليش مكان في مملكة الحب .... مكتب التنسيق مش هيقبلني ..... قصص السابقين بتقول كده .... راجل باين حصله نفس مأساتي بيقول :
إذا شاب شعر المرء أو قل ماله ------ فليس له من حبهـن نصيـب
و بعدين لو حصل و بعد ما اتخرجت على خير و دخلت الجيش و أديت الواجب الوطني المقدس .... منا مش معقول هعمل يعني زي هيثم و تامر ... و بعد ما خرجت م الجيش مواطن صالح و اشتغلت كام سنة و بعديها سافرت بره و عملت تلات قروش أربعة ... مهو القرشين ما بقوش يعملوا حاجة بعد العلاوة التلاتين في المية و زيادة الاسعار 100 في المية دي .... عملت الخمس قروش العمي و رجعت مصر و و اتنيلت بنيلة فتحت صيدلية و بعد الصيدلية فتحت بقية السلسلة و بعد السلسلة عملت مخزن محندق و بعد المخزن عملت شركة توزيع صغنتوته كده و بعدين أكبرها و بعد كده عملت مصنع الأدوية المحندق في العاشر و بعد كده كبرته .... كنت عايز أقول إيه بقى في الأول ؟؟؟ ..... آه, معلشي أعراض الزهايمر .... بعد كده إن شاء الله لو فاض في العمر بقية و حصل و أتجوزت ... أخلف عيل مثلاً يلاقي أبوه شعره أبيض و زي الدب القطبي الجنوبي !!! ... الواد يجيله سكته قلبية يموت يعني !!!!! .... على آخر عمري أقتل طفل بريء !!!!!! لأ و يبقى أبني !!! ... أنقّص الكثافة السكانية على حساب ابني ...
و بعدين لازم استعد ... أسلّح لساني بسلف ديفينس .... أي واحدة تعايرني في يوم من الأيام أن شعري أبيض زي البفته البيضا .... و لا شبه الكفن ... ياللا محدش واخد منها حاجة .... لازم أغيظها بالبيت ده .... أروح باصص ليها من تحت لفوق و لازم بـ"إذدراء" لو مش بإذدراء البيت مش هيجيب نتيجة.... و أقول بصوت عالي كله شموخ كده و عزة نفس بقى ...
عيرتني بالشيب وهو وقار ------ ليتها عيرتني بما هو عار
لازم أستقيم اكتر في الكام يوم اللي باقيين ليا من عمري .... و على رأي الشاعرة أليسا زي ما قالت في ديوانها قبل الأخير .... العمر فيه كام ليله ؟!!! ..... مش هقزقز لب في الشارع تاني .... مش هزوغ م السكاشن تاني و أخلي واحد يدخل مكاني .... مش هسمع الحنطور و العنب في ميكروباصات و لا تكاتك تاني ..... هنضم لجمعية الرفق بالحيوان و الرفق بالإنسان و جمعية رسالة و لو ينفع ميسد كول لو طلب الأمر كمان ....
و هستسلم للأمر .... عادي بقى أن شعري يبيض ... مش هصبغه .... مهو رئيس الوزرا بتاع تراكمنستان شعره أبيض كله .... و خالو صلاح الله يرحمه كان شعره أبيض .... هو البط لما شعره بيبيض بينتحر مثلاً .... عجزت بدري يا واد يا درش وماله .... بس بكره يمنعوك من الإتحاد و يقولولك قواك العقلية لا تسمح بتولي المناصب العليا.....
هي شعره طقطقت أبيض و هتجر وراها البقية .... تقولش حد بيدفعلهم مكافئة !!!!.... وزي ما بتقول أم سعيد بتاعة الجرجير .... أول الغيث قطرة و أول الشيب شعره .... ألا ليت الشبااااااب يعود يوماً فأخبره بما فعل المشيب ..... عنجزت بدري و اللي كان كان ...
إسبوع كامل عدى من ساعة اليوم اللي اكتشفت فيه الخيانة ... ضميري مش مطاوعني أقتلها و آخد تار شبابي .... من يوميها بغني .... علي صوتك بالغنا لسه الأماني ممكنة ..... أصل أنا عندي شعره ... ساعة تروح و ساعة تيجي ... أصل أنا عندي شعره ... ساعة تروح و ساعة تيجي ... أصل أنا عندي شعره ... ساعة تروح و ساعة تيجي ... أصل أنا عندي شعره ... ساعة تروح و ساعة تيجي ...
لازم أعالج نفسي نفسوياً ..... لازم آخد كورسات تنمية بشرية .... أنا عايز إبراهيم الفقي يقولي إن الشباب شباب الروح .....
أنا بقيت كركوووووووووبة ..... و مش كركوبة بس ده أنا شكلي هحجز في السراية الفوشية !!!!! .... أعمل ايه يعني؟ .... أصل أنا عندي شعره .....
المشاركات
