بصوا بقى يا جماعة بقى يا جماعة م الاول كده ....
أحنا لازم يكون لينا موقف واضح و صريح ...
آيوه طبعاً ...
يا أبيض يا أسود ...
يا أبيض يا إيه ؟؟؟ ... أييوووه يا أسود .... أسود من ضمير الرئيس الأمريكي المحترم جورج بوش ...
لابد لنا من وقفة ...
لازم نأدبه و نوريه العين الحمرا ... الحمرا قوي .... أحمر من القوطة يا عنيا... حمرا بلون الدم .... هو فاكرنا إيه ؟؟
لأ مش إحنا يا باباااااا .... لو كنت فاكرنا ضاني لأااااااا ده احنا لحمة جملي .... يعني سفينة الصحراء و الأراضي الخضراء ... يعني قوة التحمل ....
هي الرسالة ما وصلتكش و لا ايييييه ؟؟؟؟ .... لأ لو ما كنتش وصلت نوصلهاااااااالك ....
لا و الله لو ما كنتش وصلت نوصلها .... لا و النبي لو كده يبقى لازم نوصلها .... علينا الطلاق من الجرايد القومية لنوصلها ..... إلهي يا رب ما نكسب البرازيل في نهائي كاس العالم الجاي لو ما وصلناها ...
قدام الأرجنتين و حذرناك ..... و ده كان ماتش ودي .... يعني قولنا كده يمكن يعقل و يرجع في كلامه ..... لكن باين أنك مش بتلقطها و هي طايرة ...
احنا مش اتوفستر يا باباااااا.... و لا تكونش شايفنا جيلي .... آه جيلي ... جيلي اللي هو جيرارد مش جيلي بالفراولة ....
لو كنت افتكرت نفسك معلم فاحنا الزباين يا معااااااااااااالم ....
مش هنشجعك يا عم الشجاع انت في أول يونيو ... ورينا بقى هتعمل ايه بقى قدام الكونغو الديموقراطية ..... خلي الحضري ينفعك .... أمانة السياسات بتاعتهم هي اللي هتعرفك قيمتنا ....
عارف جيبوتي ... بص بقى سفيرنا هناك بقى على فكرة بقى على فكرة أهلاوي و مش هيخلي البعثة تعبرك هناك .... و الجيبوتييييين ناس زي العسل و واقفين معانا .... هنشجعهم .... ياللا بقى قفلت معانا ... شوف حتى الجيبوتيييين هنساندهم ... على الأقل اعلانات الخمور بيحطوها على الشاروبات بريحتها المعفشنة مش على التيشيرتات .....
لأاااااااا ... ما تحاولش مع مالاوي .... كله إلا مالاوي بقى يا بابااااااا .... دي حتتنا يا باشا .... دي كلها بقى نينجا تيرتز و عندهم شرف السلحفة زي عود الكبريت.... يعني هيقطعوك يا بابا لو فكرت تكسبهم .... فكر قبل ما تلعب في عداد عمرك.... العدادات البايظة هتاخد مخالفات في القانون الجديد ... هناك بياكلوا المعلمين يا معلم ...
عايز تضمه للمنتخب .... ضمه للمنتخب ..... من حقك تضمه للمنتخب .... و من حقنا ما نعبركش بقى في الماتشات .... احنا في بلد ديموقراطي ديموقراطي و حرية عدم تشجعيك و انت و الحضري و المنتخب مكفولة بالقانون و الدستور ..... مش هنشجعك يا شحاااااته .... ادينا بنقولها بصوووووووت عااااااااااليييييي .... انت كده تتحدى الشعب المصري مش بتتحدى الملل.... بتتحدى الفراعنة و شكلك عايز تسمعنى ده احنا اللي أخدنا الكاس ست مرات ... بكره نقعد جنب الحيطة و نسمع الزيييييييييييييطة .... هتخسر كل الماتشات و تقعد تندم ... شوبير أهو مستنيلك غلطة .... عايزنا نرجع زي زمان قول الزمان ارجع يا زمان ....
آآآآآآآآه صحيح .... يوووه .... أأأأأأأأأأأأخ ..... يا نهااااااااار أبيض ..... يا ليهوي ..... يا خرااااااااشي
نسيت أنوه في الأول يا جماعة .... يوووووه على الزهايمر ... نسيت أقولكم إن وصلة الردح اللي فاتت دي إنتاج سوق التلات ببولاق الدكرور .... اللي فوق ده طفل الأنابيب اللي طلع من تجميعه بقى لكل اللي المشجعين المصريين قوي قوي اللي قالوه في التعليقات على ضم الحضري للمنتخب المصري على المواقع الرياضية..... شفتوا أنا بتعب قد ايه .... سايب تجميعات امتحان البابلك هيلس و بنداري و لا الشاذلي ... الشاذلي و لا بنداري كده و لا انا بداري كده و لا انا بداري كده و لا انا ده .... و لا أذاكر بقى المحاضرات و أمري لله .... طبعاً استقريت على الأهم و هو أني أقعد أجمع في تعليقات المشجعين على المواقع الرياضية دي ... بتعب ...
نرجع بقى لكلامنا .... أنا اتصدمت .... جالي صداع نصفي و تلات تربع من اللي قريته ..... صباع رجلي الصغير في الرجل اليمين جاله (كالو) م اللي سمعته .... الشعراية البيضا اللي طلعتلي في راسي كانت هتقلب أخضر.... لأ و الله و نعم المشجعين .... قال و شجع شجع ... مصر ... مصر بتلعب مصر .... بلا اتصالات بلا وجع دماغ يا راجل بقى ...
بجد عيب عيب علينا قوي ... هو المنتخب بقى منتخب حسن شحاته و عصام الحضري .... لا أخص علينا أخص .... لأ أخص أخص أخص .... هو ماتش أهلي و زمالك هنشتم شيكابالا و أوسة و لا أينو و متعب .... ده منتخب مصر ..... يعني بيمثل مصر .... يعني المفروض نترفع عن الصغائر دي علشان نكسب .... أنا ماليش في الكورة و لا نيلة ..... بس الصدمة هزتني .... مش هنشجع مصر؟؟؟؟ .... دي مصر يا عبلة و الله مش غانا .... حسن أبو شحاته شايف أن الحضري أحسن واحد يقف جون لمنتخب بلده خلاص ايه المشكلة بقى لما يجيبه يقف جون...
عيب و الله ما الناس دي مصريين برضوا و شربوا من نيلها و جربوا يغنولها .... يبقى ليه بقى ده كله يحصل ... المفروض اللي يقول مش هنشجع مصر في ماتشاتها دي يتشنق في ميدان عام .... يتعذب .... يتسحل ..... نسمعه العنب العنب العنب 60 مرة في الساعة في الأربعة و عشرين ساعة يوميا .... تشجيع أي منتخب هيلعب ضد بلدنا علشان لعيب مش عاجبنا لا ينفع في شتا و لا في صيف ... و لا حتى في آواخر الشتا قبل اللي فات ....
لأ .... أنا هشجع مصر ... و طول الماتش هشجع الحضري و هقف جنبه .... بعد الماتش بقى أولع فيه أقف جنبه أحرق نفسي بجاز ... أحنا أحرار في علاقتنا الشخصية معاه .... طول الماتش .... الراجل الدمياطي ده بيمثل مصر مش الأهلي و لا الزمالك و لا كفر البطيخ لإنتاج الدرة المشوي ....
عيب علينا و الله عيب لو ما وقفناش مع حسن شحاته في الـ90 دقيقة بتوع كل ماتش من الماتشات ... بعديها احنا أحرار .... لكن طول الماتش ..... احنا مصريييييين .... و لازم نشجع اللي شايلين اسمنا و اسم بلدنا ....
الموضوع مش موضوع تعصب لنادي دلوقتي .... لكن ده بقى تعدي على مصر .... بنشردها بأيدينا .... هيبقى الشعار .... مصر بتتشرد كل يوم بينا .... مصر مش المنتخب ؟؟؟؟ .... لأ هي المنتخب ... مصر هي كل حاجة باسم مصر ... مصر العلماء و الفنانين و الرياضيين و السياسيين كمان .... مش هتتجزأ أبداً مصر ...
مصر هي أمي مش حماتي ..... هنشجعها في كل حاجة ... و زي ما قالوا زمان ... مصر هي أمي .... و مصر يا أمه يا سفينه .... إلا عقوق الأمهات .... لازم نبر مصر ....النسب أثبته التاريخ ..... كل المصريين بما فيهم الحضري فصيلة دمهم Nileموجب ..... مش وقته خالص نتكلم عن الحضري و موضوعه ... ده ليه وقت تاني .... دلوقتي ده واحد شايل الجنسية المصرية و بيلعب باسم مصر .... يبقى كلنا معاه ... و لا ايه يا جدعان بقى يا جدعان بقى ... ده متربي على الفول زينا و الله ... متطعم بالطعمية زي كل المصرين ....
ربنا يديم علينا نعمة العقل و ما يشمتش أولمرت و لا بشبوش فينا يا رب ....
*******************
مش عارف الصراحة إيه هيبقى موقف أمير عبد الحميد لما يقابل الحضري في تجمع المنتخب اللي جاي .... ياما أكد الحضري إن أمير حارس كويس و الفرصة هتجيله ... لكن بقى عمونا أمير اللي طلع مش أمير ... إما صدق .... تقلوش لقى لقية ... الحضري مشي و لا طفش و لا هرب من هنا و عم أمير يقول في تصريحات .... الأهلي مش هيقف على حد ... الأهلي أكبر من أنه يعتمد على لاعب ... يا عم أمير خلاص و الله عرفنا ... و هو مصر يكمل تصريحاته ضد الحضري ... يا راجل خلاص فهمنا .... يا عم يهديك يرضيك يولع فيهم و فيا و فيك .... مفيش فايدة زي ما بيقول عماد بعرور .... برضوا مش عايز يبطل كلام ... طب أجيبلك سد الحنك يا خويا ؟؟؟؟ ... مفيش برضوا فايدة .... إسهال التصريحات لسه شغال .... يا خويا طب لو الحالة خطيرة نعملك استئصال راديو .... و لا فيه أي تقدم ... طيب دلوقتي بقى هتحط عينك في عين الحضري ازاي يا أمير ؟؟؟