كنت ناوي أتكلم عن حاجات تانية كتيرة كتيرة قوي و خصوصاً إن إجلتها لبعد الإمتحانات و بعد كده أجلتها علشان التاج الجميل من العضوة الجميلة ميوشا .... و بعد كده بقى قولت الفرصة جاتلي و هتكلم بقى و أعمل دوشة بقى و هيييييييه ... يا حلاوة الحرية يا حلاوة .... بس للأسف يا حلولو يا حلاوة .... و قليل البخت يجيله العظم في الكرشة أو في منطقة شعبية تانية يقال إن نفس قليل البخت اللي جاله العظم في الكرشة ده بقى ممكن " يعضه الكلب في المولد " ....... خلاص بقى نويت أفضفض ...أووووووم ايه ... إذ فجأة كده ينادي منادٍ إن يا أهل مصر الكرام اسمعوا وعوا ..... شريط تامر حسني الجديد نزل ... بم ببم بم بم طششششششش .......
ياااااااااااه.... تامر ..... كتير قوي حاولت أحبك و أموت فيك و أرمي نفسي تحت رجيلك و اعيط و اتشنهف كل ما أشوفك زي بقية الناس ... و أقدم نفسي للتجنيد بدالك يا تيموس لو وصل الأمر .... بس للأسف مش عارف و الله يا تامر ....من رمضان اللي فات ده على طول قولت إن عفونا عنك و عن أخطائك اللي تودي في داهية بعد ما عملت التتر بتاع مسلسل الكارتون سنوحي .... مفيهاش مشكلة لما تقلد محمد منير .... صحيح سنوحي مش زي بكار ... و لا تامر زي منير الحق يتقال برضوا و ليكن ما يكون .... بس الأغنية دخلت دماغي الله الوكيل يا شيخ .... السجن تأديب و تهذيب و إصلاح .... ممكن برضوا لإصلاح الأغاني الهبلة .... الفيلم بتاع عمر و سلمي ؟؟؟ لا لا أنت بدئت تصوره قبل الحكاية دي يعني شوفنا للأسف الهبل بأثر رجعي .... قولت بقى لما أسمع الشريط الجديد بتاعك بقى .... نشوف الجديد .... مممممممم ..... شريط معقول .... أحسن شريط ليك ... أحسن الوحشين بمعنى أصح .... مفيهوش هطل أو هرتلة زي ما في الشريط اللي فات ... ده طبعاً باستثناء الأغنية الشعبية .... أخرسي خالص يا وليه .... اسكووووووتييييييي مش الحياة من غيرك طلعت أحلى ..... و كنت فاكرها في بعدك هتكون صعبة ومش سهلة ... و آه يا اختي كان بينا كلمة و وعد .... بس معلشي بقى أحنا مش لبعض ... انتي في حالك يا حلوة انتي و أنا في حالي و كل يوم نسأل على بعض .... وصلة ردح آه بس مش مشكلة في وسط شريط كامل .... تغيير الموود . معقول يا ولاد تامر عقل !!!! ... يمكن يكون تاب و أناب عن الطرقعة ... طيب إما نشوف الكليب ....
نشوف أغنية هي دي .... أنا بحب زينة ... دمها خفيف و عسولة .... كلمات الأغنية هي :
أكتر حاجة بحبها فيكي هو ده .... آه هو ده
آآآآآآآآآآه قلبك ...
أكتر حاجة شدتني ليكي هي دي ......... هي دي ....
طيبة قلبك ...
دي الأغنية عادي لما تسمعهوها أوديو .... مفيهاش حاجة عادية يعني و لا حاجة غريبة يعني ...
نيجي بقى للكليب و الصصبنس و الأحتبنس و أهم حاجة الفكر الأنبلايصي في إخراج الكليب .... أو لنقل الفيلم لأن الكليب جزء م الفيلم ....
:::::: أكتر حاجة بحبها فيكي هو ده .... آه هو ده
" تؤ .... أزعل بجد .... لأ أرجوكي أوعي تفهميني صح .... إيه النية الزبالة دي , أنا قصدي ....... "
آآآآآآآآآآه قلبك :)
:::::::: أكتر حاجة شدتني ليكي هي دي ......... هي دي ....
" أيووووووووووة ... أحلى حاجة فيكي .... يوووووووه هتفهميني صح تاني .... أنا قصدي يا بنتي ...."
طيبة قلبك :)
الصورة ما بتكدبش !!!! ...... ليه كده يا زينة ... يعني أنت دايماً كده مدلوقة و إما بتصدقي ..... لا يسلم الشرف الرفيع من الأذى ..... طبعاً جريتي على بابا .... لازم يتجوزني يا بابا ... أزاي الوغد يقولي صباح الخير و هو رايح الأستوديو ... بعد كده يا بابا ده بيبص على ( .....) و (.......) – حذف ما بداخل الأقواص بواسطة الرقابة الدرشوشية - بيغازلني غزل مش عفيف يا بابا .... يا بابا بقى يا بابا .... يا بابا بقولك غزل صريح صريييييييح يا بابا .... يا بابا هو أنا أخلص م البرنامج أياه يطلعلي تمورة يا بابا ..... يا بابا أنا مش ناقصة تشريد يا بابا بقى يا بابا بقى يا بابا ...
يا أونكل قاضي و الله ما كنتش قاصد ... أنا ما كنتش قاصد كده ... أنا كنت بشاور على قلبها ... و ... و .... طيبة قلبها ..... يا أونكل مشيها طيبة قلبها بقى يا أونكل لأسيب عليك المعجبين و المعجبات ... أعمل ايه يعني ما هي طيبة قلبها كنت فاكرها من سكان العمود الفقري .... فقري فقري يعني ... – هههههه خفة يا تيموس – و عاااااااااااادي ....
بجد خلااااااااص جبت أخري أنا من الواد ده ....
يا بااااااااااااااي .... بقة ... بفتح الباء و تشديد القاف ....
زي الهم على القلب بالنسبة ليا مش بقولكم ..... عامل زى السمنة البلدي كده , تقيل على القلب ... ممكن يجيب جلطات ... عاملي قلق ... مش بنام الليل بفكر فيه ... لأ طبعاً مش بحبه ....أحبه إيه بس .... أحسن يسمعني فيفهمني غلط .... مهو ما بيفهمش دلوقتي غير غلط .... أطيق العما الصراحة و ما أطيقهوش .... لكن اللي هيجنني اللي وصله ده وصل ليه إزاي ؟!!!
ده السؤال بقى اللي مش مخليني أنام الليل أفكر فيه ؟؟
حاولت أحبه ما عرفتش .... مش قادر أقبله .... حاولت أظلطه من غير مضغ ما عرفتش .... أعمل ايه ؟؟؟!!! مهو مش دوا هشربه بالعافية .... حاولت اقنع نفسي مفيش ....
قولت يا واد يا درش اسمعه علشان صوته و موهبته الفطرية ....
لقيت عقلي الباطن طالع من البدروم بهدوم مهلهلة أكيد من الأمتحانات اللي فاتت ... بيلطشني بالقلم و يقولي إخرس يا وغد .... ده لا موهبة و لا يحزنون... قال موهبة فطرية قال – ده عقلي الباطن يتحدث من الأعماق – دي موهبة مهلبية .... لا صوت ولا بتاع ده لو طول في كلمة يهنج في النص .... يتعمله ريستارت من أول وجديد .... محتاج نيو سوفت وير .... ده عقلي الباطن طلع ليه في العنجليزي كمان .... خلوه يغني الحتة بتاعة الست أم كلثوم "أنت عمريييييييييييييييييييييي- مد فيه خمس دقايق كمان – ييييييييييييييييييييييييييييييييييييييي – بس كده - أنت عمري اللي أبتدى بنورك صباحه اللي ابتدى بنورك صباحه أنت أنت عمرررريييي "
بلاش أنت عمري أم كلثوم كانت بتقوي نفسها بالبتاعة السلك دي .... خلينا في ليمو حبيبي ... العندليب مش بتاع الدقي طبعاً .... شوفتوه و هو بيقول "جبااااااااااااااااااااااااااااااااااااااا- كمل المد لحد عشر دقايق كده و لا حاجة - ااااااااااااااار جبار " اللللللللله ..... يا سيدي يا سيدي على النفس الطويل ....
عرفتوا إن مفيش موهبة حتى من النوع المهلبي – نسبة إلى المهلبية – لأن المهلبية ألذ حاجة بحب آكلها ؟؟؟ .... طيب أعمل ايه ؟!! ....
قولت خلاص .... أكيد هسمعله علشان الكلمات .... أكيد هلاقي في الكلمات اللي يحببني فيه .... حاولت أدور على كلمات خلاص مش لاقي غير عملتي لكل شباب الدنيا ( قلق ) و مش لاقي علشان يكمل القافية بلا قافية يعني غير ( خلخال ورق ) .... الخلخال من الخلل ... زمان مدرس الفغانساوي واحد قاله كومون تابل تل و خد من التل يختل .... مهو شغل خلل – بضم الخاء – بخلل بقى ....
و لا كمان بيقول في نفس الديوان في قصيدة أخري ( يا جامد أنت آه يا واد يا معدي ) .... ده ايه الرومانسية دي .... يوسف السباعي يا ولاد ده و لا تمورة... جتك سبع ياكل مناخيرك يا تامر و تمشي بيها من غير فتحات .... مشتاق ايه يا ابو شوق ما تروق ما تصحصح حبه و فوق ... و حب بعيد عن قلبي يعني أطلع من رااااااااسي ... نعمييييييييييييييين يا عوووووومممر .... وصله ردح في أغنية !!!!! ... ردح ردح يعني بجد مش ردح مش ردح و لا ردح هزار مثلا .... مطرب رومانسي بتاع الجيل بيردح ....ليه ؟؟؟ هي الأغنية وارد بولاق الدكرور !!!! ..... ختم الأغنية "ما تضيعش في وقتي و بجد انا مش فاضي " .... يا جماعة الواد مش فاضي يا جماعة .... الواد عنده تجنيد مش فاضي ... الشريط اللي فات كان كافي يعملي قلق بما فيه الكفاية .....
اه و الله الشريط كسر الدنيا من كتر الدوشة اللي فيه ... لأ و كملها بقى بالكليب..... عنيا بتحبك ... نسي يحط عليه يافطة للكبار فقط .... الواد الشباب الروش طحن نسي أن عنده تجنيد مش هينسي حكاية للكبار فقط دي مثلا يعني مثلا ؟؟؟؟ ... هبقى أفكّره المرة الجاية ... ربنا يستر .... بس على فكرة للموديل اللي كانت في الكليب أحب أقولك بس يعني للزمن و العبرة و العظة بيني و بينك كده من غير ما حد يسمع خالص .... اللقطة أياها اللي في الكليب مش حلوة على الإطلاق و الكل لاحظها .... مفيش ضرورة درامية ساخنة تبررها زي ما بيقولوا في الأفلام .....خالد يوسف على فكرة مش مخرج الكليب .... أنا قولت يمكن يكون هو المخرج و لا حاجة بقى و لا تنت إيناس الدغيدي ..... و لا ده و لا دي !!!! .... من منطلق يا خوفي يا بدران للموضوع يتكرر مش أكتر يعني يا بنتي .... أنتي برضوا في سن جدتي .... و اليو تيوب دلوقتي ما بقاش سايب حد في حاله .... يقال أن اللقطة دي أكتر حاجة كانت متداولة على الموبايلات في الوقت ده ....
آدي بقى كلام الأغاني ..... آخره يتغني راب .... يتحكي يعني مش يتغنى ... بلاش الكلام .... سيب يا درش نادية و خد سوسو .... بلاش نادية بلاش سوسو خد فوقية ..... ندور على اللحن ... مفيش مشكلة إن الأغنية تكون كلماتها عادية أو تحت العادية و ممكن يكون صوت اللي بيغنيها ما تفرقش بينه و بين نقيق الدفاضيع تحت بيتكم بالليل .... أكيد ممكن تكون الألحان رائعة .... هحبه علشان الألحان ... هحاول أقنع نفسي بكده ... طلع إن مفيش لحن عدل فالناس تسمع الأغنية علشان اللحن مثلا يعني .... ألحان تحت المستوى المتدني ...
المشاركات
1 التعليقات:
جامدة جدا المدونة دي
ان شاء الله اول زيارة و مش اخر زيارة و يسعدني زيارتك لمدونتي
إرسال تعليق