الجمعة، ٧ أغسطس ٢٠٠٩

معفن ...بس و الله رغم أنفي:(

بعترف اوك ان فيه ناس في الدنيا عندها رغبة انها تكون معفنة ... العفانة طبع فيهم ... و في التاريخ ناس كتير كانت بتكره انها تستحمي زي هتلر و ايناشتاين و بيتهوفن و من العرب الحريري و البحتري و الجاحظ و أبو حيان التوحيدي ...

لكن و الله العفانة عمرها ما كانت من طبعي خالص .. بستحمي كتير و كل حاجة، و بحب أكون نضيف ... بس كان دايما عندي مشكلة واحدة بس ... أني لا أؤمن بالباسكت .... سلة المهملات يعني باللغة الفرعونية ... يعني معفن نص نص ... ما كنتش بستحمل اني أشيل المخلفات – أنا بقول اسمها زبالة أسهل - سواءا كانت كيس او ورقة او ... أو ... لحد ما الاقي الباسكت! ..... والموضوع علشان محدش يلمح ملهوش علاقة بأني قصير نسبيا فمتعقد من كرة السلة ..... خالص !!!

أكيد عنترة بن شداد بأخلاقه العالية مثلا لما كان بيقف مع عبلة ياكلوا شيبسي قدام بير الجبيلة ... ما كنش عنترة بيقولها .. أكسكيوزيمواه مادمازيل أروح أدور على باسكت أرمي فيه الكيس الفاضي!!!

الموضوع اول مرة أدخل في جدال فيه كان مع بنت ... أنسة و بالفرنساوي جيرل ... كنا واقفين قدام استراحة على الطريق في رحلة خلال معسكر من معسكرات الجامعة .... البنت طبعاً كانت واقفة مكسوفة و وشها أحمر و عينيها في الأرض بتبص انا لابس برباط و لا من غير ... بس كبستها لأني كنت لابس كوتشي:) .... كانت كل ما تخلص أكل حاجة تعين الكيس الفاضي في شنطتها .... و الشنطة كانت مليانة على الآخر بما يدل على انها كانت بتاكل كتير و اختصارا توصف بكلمة "طفــســـة"!!!

و لأننا مفيش موضوع حيوي نتكلم فيه .... خاصة أنها ملهاش علاقة بحماس علشان تحاول تهديهم و لا علاقة بالقمر أم عيون زرقا و لا بوتجاز كريازي هيلاري كليفتون علشان توصيها على العلاقات المصرية الأمريكية و كمان شكلها ما تعرفش مين أوباما علشان نتكلم عن نظرته لأطروحة بشبوش حول الشرق الأوسط التخين ... فقعدنا نتكلم في ايه بقى .........

طبعا عرفتم ....

أيوه، برافو ...

في الزبالة :)

و هل نرمي الحاجة في الشارع و لا لأ ... طب لو مفيش باسكت في الشارع .. أحشي جيوبي بالحاجات دي يعني ... طب لو جيبي ضيق !!!! .... طب لو اتقفشت تحري و انا راجع بيتنا و خدوني على القسم و الظابط فتشني يلاقي الزبالة في جيبي ... تعتقدوا هيصدق لما أقوله اني صيدلي محترم سينجل و يقدس الحياة الزوجية مادام مراته هتسمحله انه يضربها بالشلوت!!!!

المهم، قعدنا نتناقش كتيييييييير قوي في موضوع الزبالة ده ... و زملاتي طبعاً عينيهم هتخترق حجابي الحاجز فاكرني بظبط! .... نيتهم سودا قوي ..... طبعا بعد ما أديتها ظهري و كل واحد ركب في اتوبيسه علشان نرجع السكن كانت أبلة فضيلة اللي واقف معاها بتفضي كل اللي في شنطتها على الأرض .... آه فعلا ... و نسيت ان ليلي العامرية لما كانت بتتمشي مع قيس بن الملوح على كورنيش كوبري قصر النيل الساعة واحدة و خمسة بالليل كانت بتحط قشر الترمس تحت العمة بتاعة قيس لحد ما يروح يرميه في الباسكت ... نسيت تاريخنا العظيم و رمت الحاجة في الشارع!!!! .... تباً لها .....

ما خبيش عليكم بقى كنت في سيتي ستارز من كام يوم في مقر حركة سوزان مبارك الدولية للمرأة من أجل السلام ... محدش يسألني كنت بعمل ايه هناك باعتباري راجل :) .... لكن المهم ان المكان كان نضيف زيادة عن اللزوم ... و انا خارج خدت قرار بيني و بين نفسي .... لازم انضف بقى سلوكيا و اخلاقيا ... مش هرمي حاجة على الأرض تاني .... مش هستسلم لمبعوث العفانة من قبل إبليس أبداً ... لا يونكن ...

خرجت من سيتي ستارز ركبت أتوبيس النقل العام من أول الشارع و خدت التذكرة ... و دي كانت أول أختبار حقيقي ليا ... احتفظت بالتذكرة و الله العظيم لحد ما نزلت ... و دورت على باسكت .... عيني المحبة للنضافة لمحتها بسرعة ... رحت رايح رميت فيها التذكرة ....... و هيييييييييييييييييه واحد صفر.... واحد صفر ..... واحد صفر .... يا درش يا جااااااااااااااامد .... و هوبا ايه ... هوبا اه .... إن شاء الله هنكسب :)

رحت ركبت من عبود لحد بلدنا الغالية منيا القمح .... الأتوبيس من حظي النحس كان التكييف فيه بايظ .... و لأن الدنيا حر موووت ... طلعت منديل و أول ما باش المنديل تغلبت على وساوس الشيطان و حطيته في جيبي ... و جووووووووون .... اتنين صفر .... اتنين صفر ... اتنين صفر ... و الله حي التالت جاي الله حي التالت جاي .... إن شاء الله هنكسب ......

الأتوبيس بدأ يتحرك و انا رحت في النوم ..... و يا نهار مهلبية على الكوابيس اللي جاتلي .... وصلت منيا القمح على خير ... و كان قدامي تحدي كبير ... اني ما رميش تذكرة الأتوبيس و المنديلين البايشين و زجاجة "أزازة" المية الفاضية في الأتوبيس و أسيبهم و أمشي ..... والحمد لله خدتهم معايا و نزلت ... و جووووووون ... تلاتة صفر تلاتة صفر تلاتة صفر ... و الله حي الرابع جاي ... الله حي الرابع جاي .....

أول ما نزلت من الأتوبيس عند الزعيم قعدت أدور على باسكت حواليا ما لقيتش .... قولت يا أبو الدراديش ما تخدش في بالك .... مش هتسلم من أول اختبار ... قاوم و اتعب .... أمشي قدام شوية هتلاقي واحدة ... افتكر ليلى العامرية و قيس بن الملوح ... مش معقول هتبقى على آخر الزمن زي اينشتاين و بيتهوفن و البحتري و الحريري .... دلوقتي هترمي الحاجة في الشارع ... بكره ما تسحماش غير في عيد تحرير سينا .... لأ ... مش ناوي اسلم و لا ناوي اطاطي ... هرمي في باسكت يا عبد العاطي .... مش ناوي اسلم و لا ناوي اطاطي ... هرمي في باسكت يا عبد العاطي ....

عصرت على نفسي لمونة م الكبار اللي بييجوا في الاعلانات و مشيت لحد شارع "القيصرية " ... و ده الشارع الرئيسي اللي عندنا اللي بيكتظ – جامدة يكتظ دي- بالبائعة الجائلين و المقيمين ... طول الطريق من الزعيم لحد أول الشارع مفيش ولا بسكت ... و لا يمين و لا شمال .... حاجة تخنق .... و انا شايل الأزازة و المنديلين البايشين و التذكرة المكرمشة و لا حياة لمن تنادي ... كل شوية الاقي كومة – عفوا – زبالة مرمية على الجنب بس بقول لأ ... مش هرمي الحاجة عليها كده أنا بذود الأزمة و بضيف عبء على كاهل جامعي القمامة .... يا سلام على الجملة دي على النيعمة انفع كادر سياسي 6*9 بالألوان ... و صورة صورة كلنا كدا عايزين صورة ....

دخلت شارع القيصرية اللي اكيد مش معقول اتسمى كده علشان ولدوا واحدة فيه قيصري ..... لأن الشارع اسمه كده من زمان حسب تصريحات مصدر مطلع – نانا الله يرحمها – ده غير ان الناس زمان ما كانوش يعرفوا حاجة اسمها كيسري .... كله عند الداية و اشحن ....

من أول الشارع وصولا للمحطة ........ برضوا مفيش باسكت من الكبار كديكور حتى .... بس الأكوام الصغيرة في الشارع ده كبرت .... و بدل ما يزينوا ميدان القيصارية بنافورة أو أسريطين زرع من عند أم شحته .... زينوا الميدان بالزبالة!!!! حاجة تقرف.... بس برضوا ما رضتش أرمي الحاجة على أي كوم من الأكوام دول علشان نفس السبب اللي ذكرته فوق في حته الكادر السياسي دي ....

عديت السكة الحديد ووصلت لمركز المدينة ... آه و الله و مفيش حاجة ... ولا حتى واحدة عند قصر الثقافة التاريخي اللي في ميدان الشهداء المحاط بالأطباق البلاستيك و أدوات المطبخ بتاعة المحلات المجاورة :)

عند مجلس المدينة كان الحر خلاص موتني ... وقفت تك تك ... و هو وسيلة الموصلات الداخلية الوحيدة المتوفرة في منيا القمح!!!!

و انا معدي بعد مدخل مجلس المدينة و انا جوه التك تك و عند باب البنك الأهلي لقيت باسكت ...... آآآآآآآآآآآآآآآآخ .... بس التك تك كان فاتح على التاسع و ماشي بسرعة الضوء علشان يوديني ورا الشمس مع أرواح أجدادي الطاهرة .... كان منطلق بسرعة خمسميت عقدة في الفتلة....



نزلني التوك توك عند البيت .... نزلت و انا معايا الحاجة برضوا .... طلعت فوق في بيتنا و رميت الحاجة في الباسكت .... و إذا بماما .... اللي هي والدتي أو مامتي و في الأنجليزية تترجم لمامي .... بتقولي أرمي شنطة – عفوا تاني – الزبالة بره .... و طبعا لأن قدام البيت مفيش باسكت كبير لكن فيه حتة فاضية فيها أكوام شنط بتتشال كل يوم .... رضخت للأمر الواقع و رميت الشنطة في الشارع لأفشل برضوا في أني أكون شخص نضيف و أحرم ضميري الإنساني التقدمي الحي من انه يقول .... جوووووووون أربعة صفر اربعة صفر .... و اللأ اللأ اللأ اللأ .... عندنا درش و هما لأ ....علشان أدني لفترة قادمة .... معفن رغم أنفي ....

أعمل ايه ... بيلموا 2جنيه مصري نظافة من كل شقة في المدينة .... و مش عارفين يحطوا باسكتات في الشوارع .... طب يلموا الحاجة أولا بأول .... طب ليه أصلا بتتلم الفلوس دي ....

و هل أنا مطالب كل مرة بأني أمشي 100 كيلوا في شوارع مصر في أي حته علشان الاقي باسكت !!!!

تباً لهم ...

18 التعليقات:

سارة درويش يقول...

انا قولت رأيي قبل كده وعارف قد ايه الموضوع عاجبني ، بس في حاجة وقعت مني في التعليق اللي قبل كده .. هو ان بردو جزء من الذنب واقع ع الشعب اللي بيسرق الباسكيت من الشارع وياخده بيته او يبيعه

او حتى يبوظها كنوع من التخريب وخلاص

EMMY BABY يقول...

هههههههههههههههههههه مفروض كدة 4 ل1
بجد جميل اسلوبك فى الكتابة

لسة والله كنت بكلم عن الموضوع ده امبارح بس انا فعلا مبحبش اللى بيرموا فى الشارع وبعمل زى مانت عملت فى الاخر كدة بشيل الزبالة معايا لحد ماروح وارميها

بس احنا عندنا بسكتات كتيرة الحمد لله مغطية الشوارع من كترها هههههههه

سعيدة بزيارتك لمدونتى وسعيدة بدخولى مدونتك

اتمنى دوام التواصل

تحياتى

ايمى

غير معرف يقول...

صاصا حبيبي

ايه النظافة ده كلها ياصاصا

أنت كنت في معسكر ياصاصا هناك وياترى في معسكرات اليومين دول رحتها ؟

Darsh يقول...

سمو الأميرة سارة

انا وصلني رأيك كاملا لا ينتقص منه شيئا أو شيئين

بس على فكرة هو الشعب ممكن يسرق الباسكتات مثلا لو باسكت في كلية او في مدرسة مصلحة حكومية

بس تفتكري ممكن حد يسرق باسكت حديد من شارع أو رصيف !!!!!!!

و الله فيه ناس مجانين و يعملوها :)

Darsh يقول...

يا بختكم يا ايمي يا بختكم

دي بورصة الباسكتات نايمة خالص عندنا

احنا ممكن نعمل اتفاقية تبادل تجاري بينا و بينكم توردولنا الباسكتات و نصدرلكم الفلوس :)

مشرووووووع رائع

بس اهم حاجة الفاتورة !

Darsh يقول...

أحمد الصري بيه عبد الرحمن باشا الصلحدار

ازيك يا وله

انا لسه لحد دلوقتي ما روحتش ولا معسكر

كان المفروض اسافر بكره بس خلاص انا اتخرجت من الكلية و من الدنيا فالجامعة رافضة تسفرني المؤتمر بتاع اسكندرية:(

تبا لهم!

Unknown يقول...

أسلوبك الساخر جميل ومضحك أضحكتنى وجعلتنى أقرأ الموضوع كاملا دون أن يتسرب الشك إلى يا درش رحلتك كنت متأكد من فوزك أربعة صفر بس يا خسارة تبا لهم
تحياتى

مصطفى

نوسه وريمان فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه


وياريت تضيف اللينك عندك ومش هتندم

مودتى

رحلتنا في الحياة يقول...

مهو مش معقول انك هتلاقى فى كل شارع مكان مخصص للقمامة وخصوصا واننا شعب مش عنده اى ثقافة بخصوص النظافة والنظام وانا فعلا شنطتى ماشاء الله كيس زبالة كبير كل حاجة بحطها فيه علشان مش ارمى فى الشارع وبستنى لما الاقى اقرب مكان وارمى فيه
وافتكر لو كل انسان فكر صح مش هنلاقى اى اماكن فاضية فيها زبالة
الموضوع محتاج مشاركة من الشعب والحكومة علشان نقدر نحل اازمة دى


على فكرة عندنا شارع فى بلدنا بنفس اسم الشارع اللى عندكم :))
كويس انك عرفتنى اخيييييييرا هو اتسمى ليه كده

غير معرف يقول...

موضوع بجد تحفة
زانا ياما عملتها
بس ااقولك على حاجةمجردكنت الاقى عامل النظافة بيشيل الزبالة من الشارع ضميري بيانبنى جدا
وبحس انى اخدت سيئة على حاجةبسيطة اوى مالهاش اى لازمة
يعنى لو مشيت شويةورمتها فى السلة كان هيكون افضل
فبدات احاول اعمل كدة
عشان نطور من الناس لازم نطور انفسنا
تحياتى

almasry يقول...

كلنا معفنين ,........... واييييييييييييه



كلنا ماشيين معفنيين غصب عننا


لكن بجد احييك على اسلوبك

تحياتى المصرى

Darsh يقول...

egyboy

أنا متشكر جدا لرأيك

و أكيد أضافتك اسعدتني :)

Darsh يقول...

ريمان ونوسه فى هاكونا مطاطا

طيب انا سعيد على فكرة بموضوع الأسد الملك

انا حاطط نغمة "انا هبقى ملك جبار" رنة تليفوني

بس هو البلوج مفيهوش حاجة خالص عجبتك !!!!

عاااااااااااااااادي خالص :)

Darsh يقول...

آيوشة

فكرة ان يبقى فيه باسكت في كل شارع مش صعبة على الاطلاق

و خاصة ان فيه موارد مالية مش الدولة هتدفع حاجة من جيبها

و الكل بيسدد لأن للأسف بتتحصل على فاتورة الكهربا

-------

على فكرة مش ده اكيد السبب الرئيسي لتسمية القيصارية بالاسم ده :)

Darsh يقول...

بنوتة مصرية

على فكرة بصرة

انا ما فكرتش اني أبدأ أغير من نفسي فعلا و ان على جثتي فعلا لو رميت حاجة في الشارع كانت لما شفت عامل النضافة في محطة القطر ماشي بشوال بيلم الزبالة من بين القضبان

و الصراحة كان راجل كبير في السن .. فحسيت بالذنب تجاهه و تجاه اي حد زيه لان في الآخر انا لما برمي حاجة بزود معاناته

Darsh يقول...

المصري

الله يخليك

يعيشك برقا

نورت الموضوع يا مصري

NOUR Kamal يقول...

هههههههه
بصراحة انت بترغي كتير (( بحكيك بالمصري))

أنا عموما حاولت والله أقرأها ع نفس واحد

بس فعلا بطالبونا نحافظ ع النظافة وهما مش عاملين اشي للبلد عشان تنضف..!!

بس أول عن آخر مبدأك الأولاني غلط

والمفروض بجد يكون في حل جذري من البلدية لهيك موضوع وليوم ما توصل وتقدم الشكوى بيكون دهر وقرن مر..
والله يغير الاحوال

احترامي

NOUR Kamal يقول...
أزال المؤلف هذا التعليق.