الأربعاء، ١٨ يونيو ٢٠٠٨

الإجازة جت ترارمرم.... و أخدت الأجازة :)


يووووووووووه

إيه اللي كان بيحصلي ده!!

أنا حاسس و لا كاني في غسالة توموتيكي توموتيكي متشغلة دورة كاملة.... لأ و إيه كمان جات في الآخر و هنجّت ....

الحمد لله الايام دي عدت على الخير الحمد لله...

زي ما يكون كده واحد وغد سيكوباتي فاشي نازي سادي معقد مكلكع كان دايس فوق دماغي بجزمته الميري و هو ناكش شعره و عامل زي الواد بتاع أتصالات أوبشنز و بيصرخ بنشوة مجنونة و الزبد يتطاير من شدقيه – يا سيدي يا سيدي - و بيقول " نيااااااااههههههههه نياااااااااهههههههه هقعصهااااااا نيااااااااااهههههههههه هفعصها هفصعهاااااااااااا نيااااااااااهههههههه .... "

يا نهار أبيض كل ما أفتكر أيام الإمتحانات دي أقول الحمد لله أن الواحد خرج منها بكامل قواه العقلية و النفساوية ....

و الله الواحد كان هيجيله برد و إنفلونزا م الأمتحانات دي .... و قد صرح مصدر مسئول زميل درش – اللي هو أنا...آه و الله أنا – إن الإمتحانات أسفرت عن مقتل شعرتين سود تانيين و ظهور شعرتين بيض مكانهم ليصل عدد تنظيم الشعر الأبيض الإرهابي المتطرف إلى عدد تلات شعرات ....

شهرن كاملن و أنا نفسي أقعد كده على الكمبيوتر و ألعب بقى براحتي من غير ما ضميري البمبه الرغاي دي يأنبني .... كده بقى أقعد براحتي و أتفرج بقى على أفلام براحتي و أنام و أصحي براحتي غصب عني كل يوم الساعة 7.30 ....مهو مش هيبقى كل حاجة براحتي يعني برضوا.....

كتير قوي كان نفسي أقعد هنا و أكتب بس نقول ايه بقى ... ضرورات العمل .... ياللا خير .... خلصت أمتحاناتي من هنا و بصيت للكلية من هنا برضوا و طلعتلها لساني و غنيت .... الإجازة جت ... ترارمرم و أخدت الأجازة .... و الأجازة جت ... آه يا عيني ع الأجازة ....

نبص كده في جدول الأعمال ..... ممممممممم .... فيه استجواب مقدم من ميوشا لازم ده أول حاجة تتناقش في الجلسة بدل مفيش طلبات إحاطة بقى .... تاج جديد ... كده التيجان تتقل على راسي .... تاجين مرة واحدة !!! تقوليش مينا موحد القطرين ....

ياللا .... تؤجل بقية الأعمال للجلسة القادمة .... نخش على أسئلة التاج الجديد ...

  1. هل سبق أن فكرت في أفعال مجنونة ؟

أفعال مجنونة ... أفعال مجنونة مجنونة يعني ؟؟؟؟

هو أنا كتير عملت حاجات مجنونة كتيييييييييير كتير قوي ...

بس أني أكون فكرت قبليها .... لأ طبعاً ..

هو أنا مجنون و لا ايه !!!

أكونش مجنون مثلاً و أنا مش عارف ...

لأ لأكون مجنون و أنا مش داري ....

لو ناوي أعمل حاجة ... أي حاجة ... بفكر فيها كويس قوي ... خاصة لو كانت حاجة مهمة أو مصيرية

لكن لما بتبقى حاجة مجنونة بكتشف الحاجة دي بعد ما حصلت

يعني زي ما تقولي كده تصريفات القدر

لكن فعل مجنون مع سبق الإصرار و الترصد ما حصلش الحمد لله।


  1. هل نفذت أحد هذه الافعال؟

آه .... ما زي ما قولت من شوية هي اتنفذت بس من غير تفكير

يعني عادي كده مش مع النية المبيتة اللي بيقولوا عليها في النيابة

يعني آخد براءة أطمني :)

  1. ما هو رد فعل من علم بهذه الأفعال؟ وهل علم بها أحد؟

هو بعضها آه ....

فيه البعض بيعرف .... و طبعاً – الحمد لله يعني – بتكون عدت فترة طويلة ...

انقضت الفترة القانونية للعقاب :) و بتعدي على خير الحمد لله يعني .... و إلا ما كنتش هبقى هنا ...

بتبقى ذكري ....

  1. ما هو إحساسك بعد أن قمت بإحدى هذه الأفعال المجنونة؟

و الله يعني تقدري تقولي كده يعني بجد على فكرة يعني ممكن تعتبري الموضوع الواحد بيحس ....... مش عارف ...

أصل لو مصيبة مصيبة يعني ببقى خايف ... أما لو مقلب مقلب فببقى مبسووووووووط موووووووت ..... نيااااااااهههههههه ... ضحكة الشر.... وغد أنا مش كده ...

  1. هل ندمت على فعل جنوني كاد أن يودى بحياتك؟؟

على فكرة بقى على فكرة ... خالص على فكرة ... عمري ما ندمت و خاصة لما يكون الموضوع كان فعلاً هيودي بحياتي زي ما حصل كذا مرة قبل كده , علشان في المواقف اللي زي دي لما بفتكرها بعد كده بضحك على نفسي قوي ... هو الواحد يمتلك إيه في الدنيا غير الذكريات .... كلها سواء سعيدة أو حزينة بتفيد ...... آه و الله العظيم॥


  1. هل سبق أن وقفت أمام المرآة لتقول لنفسك إني مجنون ؟؟

هههههههههههههه ........ يا لهوس ... كتيييييييييييييير قوي على فكرة ..... أبص في المراية كده و أبحلق و أسأل نفسي " هرب من مستشفى المجانين أزاي ده !!!!" ... ده على الرغم من أني لسه ما أتجوزتش !!!!

ميوشا .... شكراً جزيلاً جداً على التاج ... خير ما أستفتح بيه الإجازة اللي يا رب تكون طويلة يا رب .... نفسي أعمل حاجات كتير فيها مش هعمل منها و لا حاجة ....


- أهم حاجة ... ههدي التاج لمين ؟

تامر نبيل ... صاحب مدونة أفكار حرة

شوية شخبطة .... حسناء

أحمد عبد الرحمن .... صاحب مدونته :)

فاطمة .... مدونة وحدي

الوجه الجديد ... بنت الماضي ....مدونة الفرح يستاهلني