الثلاثاء، ٢٢ يناير ٢٠٠٨

مشغول وحياتي أنا مشغول ...



يوووووووه على الأمتحانات و سنينها و يوووووه على وصلات النت و أيامها ... ما أنا لو كنت سمعت كلام الحكومة و اشترتلي وصلة بـ 45 جنيه كان زمان النت عندي ما بيفصل ليل نهار و نهار و ليل و اتمخطري و اتمايلي يا خيل... ربنا يديكي طولة العمر يا فيروز ...



من خطبة الجمعة 28 ديسمبر السنة اللي فاتت جامع من الجوامع الكبيرة :
"الإخوة في الرضاعة يعني يكون الأخين رضعوا من أم واحدة ... يعني لو كنت بتزور أحد الأصدقاء أنت و العائلة و الضيف عزم عليكم بلبن بدلاً من الشاي أو القهوة أو بدلاً من أي شيء من الموبقات كالكوكاكولا زيرو سكر , و أبنائك و أبناء المضيف لكم شربوا اللبن من أكوابهم في نفس الوقت و اللحظة أو لو شربوا من نفس الكوب ... لا يجعل هذا منهم أخوة في الرضاعة .... "
الشيخ دنوا يشرح في الجزء ده 10 دقايق بالظبط !!!!

*********************

بشرى سارة جداً لأخواتنا المحجبات زفتها لينا ضيفة من ضيوف برنامج صباح الخير يا مصر .. صباح النور يا درش ... الضيفة و هي خبيرة في كل من " حلاقة الشعر للسيدات و المكياج و المانيكير و الباديكير و المحارة و وش أول و وش تاني و تقل البويه " .... طنط بتقول أن البنات اللي بيلبسوا أيشارب و خاصة أيام الأمتحانات بالذات ... طبعاً قصدها على الدحيحه زي اللي في كليتنا ... دول شعرهم بيدنوا متغطي فترة طويلة جدا ... و لأن البنات اللي في كليات القمة مش راحمين نفسهم مذاكرة تلاقي من كتر التفكير المنطقة اللي فوق في الراس ... قصدها على المنطقة اللي الواحد بينطح بيها ॥ المنطقة اللي في اعلى الراس دي يا ولاد و يا بنات بتسخن قوي من كتر التفكير ... و لازم الشعر يتهوى و ما يتكتمش علشان مش يشيط و يطلع منه دخان ممكن يأثر على الإيشارب .... و طبعاً الإيشارب ده غالي جداً و ممضي من نابليون بونابرته نفسه , مهو ساب الألمان و الأنجليز و قعد يمضي على أطباق ...مش هيمضي على إيشاربات ... ده غير طبعاً أن لما الشعر هيشيط البنات هتقلب و تبقى شبه خالد صالح في فيلم "هي فوضي" .. لأ مش فوضي طبعاً ...
أعزائي المشاهدين ... بصوا يا ولاد كليات القمة ... قبل ما تتقدموا لأي بنت من بنات كليات القمة لازم تتأكدوا أن البنات دول مش شعرهم شايط و صلع زي خالد صالح ... الراجل تمثيله حلو آه و ماله ... بس مش لدرجة نتجوز واحدة شبهه ... و دبلوم صنايع بشعر أحسن ميت مرة من خريجة كلية قمة ناصعة بياض الرأس صلعاء :(

*********************

مجلس الشعب خلّص كل قضايا مصر و مشاكلها و حب بالمرة يعكنن على النجم السينمائي و بطل أفلام الأكشن أونكل ساركوزي ... قال ايه قال ايه بيسألوا هي الفظيعة كارلا زميلته هتبات معاه في أوضة واحدة في غفلة من بوليس الآداب في الأقصر بلدنا بد سواح و لا كل واحد منهم هيبات في أوضة لواحدة !!!!
سؤال منطقي برضوا حفاظا على التقاليد الشرقية, بس أعتقد أن ساركوزي لما ظهر في المؤتمر الصحفي و هو مبسوط قوي و شكله مستريح نفسويا ...اعتقد الإجابة واضحة وضوح الكلب في وسط النعاج .... أرجوك يا بدران أوعى تفهمني صح :) ..


*********************

إلا صحيح .... أموت و اعرف إيه سبب و علة و تفسير و تبرير كمية الرومانسية الطاغية اللي بيبقى فيها الواحد أيام الامتحانات بالذات !!!!... ظاهرة جديرة بالدراسة ... نبقى نقول لدكتور هاني الناظر عليها ....